Сирдарё делегацияси Хитойда
Сирдарё вилояти ҳокими Эркинжон Турдимов бошчилигидаги делегация Хитойнинг Тяньцзинь (Tianjian) шаҳрида амалий ташриф билан бўлиб турибди. Бу ташриф қуруқ протокол учрашувлари эмас, балки тўғридан-тўғри иш билан бошланганлиги билан эътиборга молик.
Делегациянинг дастлабки куни Хитой–ШҲТ Яшил саноат ҳамкорлик маркази, рақамли иқтисодиёт ҳамкорлик платформаси, Phytium Information Technology компанияси, Халқаро тиббий асбоб-ускуналар савдо платформаси маркази ва қатор йирик ташкилотларда бўлиб, замонавий технологиялар ва инновацион ечимлар билан танишди.
Шунингдек, делегация турли соҳаларда амалий мулоқотларни олиб борди. Улар аввало рақамли иқтисодиёт ва маълумотлар бошқаруви соҳасидаги янгиликлар билан танишди, бу эса Сирдарёда электрон маълумотлар тизимини такомиллаштириш ва рақамли трансформацияни ривожлантириш имкониятини берди. Кейинги қадамда юқори технологияли индустриал ҳудудларда амалиётларни кўздан кечириш ва замонавий ишлаб чиқариш жараёнлари билан яқиндан танишиш бўлди.
Шу билан бирга, делегация ахборот технологиялари ва киберхавфсизлик масалаларига алоҳида эътибор қаратди, замонавий хавфсизлик ечимлари ва IT инфратузилмаларини ўрганди. Инновацион ишлаб чиқариш жараёнлари эса делегация иштирокчилари учун янги технологик ечимларни амалий тарзда кўриш имконини яратди.
Сафарнинг яна бир муҳим йўналиши — электрон харид ва тиббиёт инфратузилмасини ривожлантириш масалалари бўлди. Бу жараёнда делегация тиббиёт соҳасида рақамли платформа ва электрон савдо тизимлари билан танишди, уларни Сирдарёда самарали қўллаш имкониятлари муҳокама қилинди.
Қўшимча равишда делегация “360 Technology Group”, “Tianjin Haitai Internet Technology” каби йирик компания вакиллари билан ҳам учрашувлар ўтказди. Ушбу учрашувларда ҳамкорликнинг амалий йўналишлари, технологиялар ва инвестиция имкониятлари муҳокама қилинди.
Энг муҳими, бу ташриф фақат кузатиш учун эмас, балки Сирдарё вилояти учун амалий ҳамкорликни бошлаш ва замонавий бошқарув ҳамда инвестиция ечимларини жалб қилишга қаратилган қадам сифатида баҳоланмоқда. Янги технологиялар ва инновацион ечимлар Сирдарёда иқтисодиётни ривожлантириш, саноатни модернизация қилиш ва рақамли трансформация жараёнларини жадаллаштиришга хизмат қилади.
Ғулом Примов, ЎзА мухбири
