Франциянинг Париж шаҳрида поёнига етган “Freestyle Chess Grand Slam Paris” халқаро турнирида Нодирбек Абдусатторов 8-ўриндан жой олди.
Кеча сўнгги тур ўйинларининг финал баҳсида норвегиялик Магнус Карлсен америкалик Хикару Накамуру билан дуранг ўйнади ва бир кун олдинги ғалабаси эвазига 1,5:0,5 ҳисобида 1-ўринни эгаллади.
3-ўрин учун германиялик Винсент Кеймер ва америкалик Фабиано Каруана ўртасидаги курашда океан орти вакили ғолибликни тантана қилди.
Ҳамюртимиз Нодирбек Абдусатторов бир кун муқаддам 7-ўрин учун курашнинг илк ўйинида ФИДЕ байроғи остида ҳаракатланган россиялик Ян Непомняшийга имкониятни бой берган бўлса-да, иккинчи баҳсда ишончли ҳаракат қилди. Қайсидир вазиятларда устунликка ҳам эга бўлганди. Тенг курашлар остида ўтган ўйиннинг 70-юришида дурангли ҳолатда Нодирбек рақибига очиқчасига ғалабани тақдим этди.
Бу, ўз навбатида, Непомняшийнинг 7, Абдусатторовнинг 8-ўринни эгаллашига олиб келди.
Халқаро турнирнинг бешинчи поғонасига даъвогарлар беллашувида ҳиндистонлик Аржун Эригаиси франциялик Максим Ваше-Лагравдан 1,5:0,5 ҳисобида устун келди.
Шу тарзда, умумий мукофот жамғармаси 680 минг АҚШ долларидан иборат турнирда ғолибликка эришган шахматчи 200, 2-ўрин соҳиби 140, 3-ўрин 100, 4-ўрин 60, 5-ўрин 50, 6-ўрин 40, 7-ўрин 30, 8-ўрин 20, 9-ўрин 15, 10-ўрин 10, 11 ва 12-ўриндан жой олганлар 7500 АҚШ доллари билан мукофотланди.
Жаҳон шахмат ишқибозлари эътибор марказида бўлган Париж баҳслари тарихга айланди. Лекин унда кечган ҳар бир ўйин, 64 катакдаги шиддатли жанглар мутахассислар томонидан чуқур таҳлил этилаётган бир пайтда Германия Франция турниридан кам бўлмаган нуфузли мусобақага мезбонлик қилиш остонасида турибди.
Эслатиб ўтамиз, жорий йилнинг 17-21 апрель кунлари Германиянинг Карлсруэ шаҳрида ўтказиладиган “Grenke Freestyle Chess Open” турнирида 3 мингдан ортиқ шахматчилар иштирок этиш талабномасини тақдим этган.
Турнирнинг асосий иштирокчилари қаторидан Магнус Карлсен, Хикару Накамура, Фабиано Каруана, Винсент Кеймер каби номдорлар ўрин олган.
Мазкур нуфузли мусобақада Нодирбек Абдусатторов, Жавоҳир Синдоров, Шамсиддин Воҳидов, Нодирбек Ёқуббоев каби ўзбек шахматининг етакчилари ҳам иштирок этиши кутилмоқда.
Т.Рўзиев, ЎзА