Сергей Фомин чорак финалда ўйнайди
Грузияда теннис бўйича эркаклар ўртасида M25 тоифасига кирувчи “Kutaisi Open” халқаро турнирида Сергей Фомин яккалик беллашувларининг чорак финалига чиқди.
Мукофот жамғармаси 30 минг АҚШ долларини ташкил этувчи ушбу турнирнинг яккалик баҳсларида мамлакатимизнинг биринчи рақамли теннисчиси Сергей Фомин грузиялик Ника Бидзинашвилини 6:4, 6:0 ҳисобида мағлубиятга учратди. Шу тариқа теннисчимиз ярим финал остонасида италиялик Александр Биндага қарши кортга чиқадиган бўлди.
Шунингдек, мусобақанинг жуфтлик баҳсларида ҳамюртимиз Денис Истомин ва Максим Шин чорак финалда испаниялик Самуэл де Фелипе Гарсия ва Жон Эчеверри дуэтини 6:2, 6:4 ҳисобида енгиб, ярим финал йўлланмасини қўлга киритди.
Энди Денис ва Максим ярим финал босқичида кипрлик Элефтериос Неос ва нейтрал теннисчи Семен Панкин тандеми билан рақобатлашади.
Жавоҳир Тошхўжаев, ЎзА
