Sambo bo‘yicha tajribali murabbiy Shavkat Jo‘rayev boshchiligidagi o‘zbekistonlik yosh sportchilar Qirg‘iziston poytaxti Bishkek shahrida o‘tgan xalqaro turnirda munosib natijalarga erishdi.

300 nafardan ziyod o‘smirlar va kichik o‘smirlar o‘rtasida o‘tgan xalqaro turnirda iste’dodli sportchilarimiz 1 ta oltin, 3 ta bronza medaliga sazovor bo‘lishdi.

Sakkizinchi bor tashkil etilgan musobaqada terma jamoamiz a’zolaridan Ulug‘bek Muhammadiyev 88 kilogramm vaznda barcha raqiblarini mag‘lub etib, oltin medalni qo‘lga kiritgan bo‘lsa, Davlat Alirizayev 70 kiloda, O‘lmas Baxtiyorov 26 kiloda va Damir Alirizayev 46 kilo og‘irlikda bronza medallariga ega chiqishdi.

T.Ro‘ziyev, O‘zA