2023 yilning 23-24 noyabr kunlari Ispaniyada o‘tkazilgan ikki davlat oliy ta’lim muassasalari rektorlari konferensiyasida shunday kelishuvga erishildi.
Ispaniyaning Kadis universiteti bazasida o‘tkazilgan konferensiya O‘zbekiston va Ispaniya oliy ta’lim muassasalari o‘rtasidagi hamkorlikni yanada rivojlantirish, tajriba almashish, qo‘shma ilmiy loyihalarni amalga oshirish imkoniyatlarini ko‘rib chiqish, ikki davlatda oliy ta’lim transformatsiyasi kabi mavzularga bag‘ishlandi.
– Samarqand iqtisodiyot va servis institutining Ispaniya Qirolligi oliy ta’lim muassasalari bilan hamkorligi 2012-2013 yillardan boshlagan, – deydi institut rektori, professor Muhiddin Po‘latov. – Yevropa Ittifoqining Erasmus+ dasturi doirasida turli loyihalarda Ispaniyaning bir qator oliy o‘quv yurtlari bilan birgalikda faoliyat olib borganmiz. Jumladan, CANEM I, CANEM II, KA 107 loyihalarida hamkorlikda ishlaganmiz. Keyinchalik Ispaniyaning Granada va Las Palmas De Gran Kanariya universitetlari bilan hamkorlik aloqalari o‘rnatilgan va talabalar va xodimlar akademik mobilligi yo‘lga qo‘yilgan, qisqa va uzoq muddatli stajirovkalar amalga oshirilgan. Erasmus+ dasturi doirasida 2017 yilda Granada universiteti (UGR) bilan anglashuv memorandumi imzolangan.
SamISI va Ispaniya universitetlari o‘rtasidagi hamkorlikning ustuvor yo‘nalishlari sifatida bakalavriatda turizm, magistraturada iqtisodiyot, menejment yo‘nalishlarida akademik almashinuvni tashkil etish, turizm va servis yo‘nalishi talabalarining amaliyot o‘tashini yo‘lga qo‘yish, magistrant va doktorantlar stajirovkasini tashkil etish, Erasmus+ dasturi doirasidagi tanlovlarda hamkorlikda tayyorlangan loyihalar bilan qatnashish, Ispaniya universitetlari professor-o‘qituvchilarining bizning institut tomonidan tashkil etilgan ilmiy konferensiya va seminarlarda qatnashishini ta’minlash hamda qo‘shma doktoranturalarni tashkil etish kabi takliflar ilgari surildi.
Konferensiya yakunlari bo‘yicha Samarqand iqtisodiyot va servis instituti hamda Ispaniyaning Huyelva universiteti o‘rtasida xalqaro hamkorlik shartnomasi imzolandi.
Hamkorlikning eng istiqbolli yo‘nalishlaridan biri bu talabalar va o‘qituvchilar almashinuvidir. Biz bu borada qo‘shma almashinuv dasturlarini ishlab chiqishimiz mumkin.
Bundan tashqari Huyelva universiteti bilan qo‘shma tadqiqotlar o‘tkazish, ilmiy maqolalar va adabiyotlar nashr etish, shuningdek, konferensiya va seminarlar tashkil etishda hamkorlik qilmoqchimiz.
Ma’lumotlarga ko‘ra, Ispaniya universitetlari yuqori xalqaro e’tirofga ega va dunyodagi eng yaxshilar qatoriga kiradi. 2023 QS World University Rankings reytingiga kiritilgan dunyodagi eng yaxshi 1000 ta universitetning 24 tasi Ispaniyaga tegishli. Mamlakatning 5 ta eng nufuzli universiteti barqaror ravishda top 300 oliy o‘quv yurti qatorida e’tirof etiladi.
G‘.Hasanov, O‘zA muxbiri