Jizzax davlat pedagogika universiteti rektori Shavkat Sharipov oliygohda tahsil olayotgan namunali talabalar, Yoshlar ittifoqi boshlang‘ich tashkilot koordinatorlari, universitet va davlat stipendiyalari sohiblari, talabalar akademiyasi a’zolari bilan uchrashdi.

– Hayot kurashdan iborat bo‘lib, bu kurashda faqat kuchli bilim va salohiyatga ega bo‘lganlar g‘olib bo‘la oladi, – deydi professor Shavkat Sharipov. – Sizning ertangi kelajagingizni ilm-ma’rifat nuri yoritadi. Shunday ekan, baho yoki diplom uchun emas, oldingizda turgan porloq kelajak uchun o‘qing va kurashing. 

– O‘tgan qisqa davr mobaynida Jizzax davlat pedagogika universitetini tanlab to‘g‘ri qaror qabul qilganimga amin bo‘ldim, – deydi birinchi kurs talabasi Muhiddin Fayzullayev. – Rektor va yoshlar uchrashuvida universitetdagi imkoniyatlar, ayniqsa, chet tilini o‘rganishning bugungi kundagi ahamiyati, turli tanlovlarda ishtirok etish, iqtidorimizni namoyon etish uchun barcha imkoniyatlar yetarli. Tadbirdan katta ruhiy qo‘llab-quvvatlash, motivatsiya oldim. Universitet rektori hayotiy tajriba misollarini keltirganda men ham o‘z rejalarimni tuzdim. 

– Rektor va yoshlar uchrashuvi ko‘tarinki ruhda o‘tdi. Tadbirni bu darajada samimiy o‘tishini kutmagan edim, – deydi universitet yoshlar yetakchisi Farzona Adilova. – Uchrashuvda juda ko‘p mavzularda suhbatlar qurildi, takliflar tinglandi. Bugungi tadbirda yoshlar, o‘quv jarayonlari bo‘yicha to‘liq ma’lumotga ega bo‘ldi. 

Uchrashuv davomida talabalar universitet ichki tartib-qoidalari, o‘quv jarayonlari va yakuniy nazorat tizimi haqida o‘zlarini qiziqtirgan savollarga javob oldi. 

A.Qayumov, J.Yorbekov (surat), O‘zA.