Бугунги ахборот майдонида реклама жамиятнинг ажралмас қисмига айланди. У маҳсулот ва хизматларнинг бозорда танилиши, рақобат муҳитининг ривожланиши учун хизмат қилади. Бироқ реклама орқали фуқароларнинг ҳуқуқлари, ахборотга бўлган ишончи ёки давлат тадбирларининг муҳим аҳамияти бузилмаслиги ҳам жуда муҳим.

Фуқаролардан келиб тушган Телевидение ва радиодаги рекламаларда нималар тақиқланади?  

Мавзусидаги саволга Рақобат қўмитаси бўлим бошлиғи Шерзод Маҳамадалиев жавоб берди:

— Телевидение ва радиодаги реклама талаблари Ўзбекистон Республикасининг 2022 йилдаги «Реклама тўғрисида»ги Қонуннинг 27-28-моддаларидан белгилаб қўйилган.

Телевидение кўрсатувларида тақдим этиладиган рекламаларда реклама жойлаштириш мақсадида давлат тадбирлари ва маросимларининг намойишини узиб қўйиш, реклама ва реклама ҳақидаги анонс, шу жумладан, теледастур анонси товушининг баландлиги даражасини реклама ва реклама ҳақидаги анонс билан узиб қўйилган теледастур ва телекўрсатув товушига нисбатан баландроқ қилиб белгилаш, телекўрсатувлар намойиш қилинаётганда реклама мақсадларида ҳаракатланувчи сатрдан фойдаланиш, бундан реклама блоки вақтида фойдаланиш мустасно.

Телекўрсатувларга видеоплашкаларни (телекўрсатув намойиши вақтида кўриниб қоладиган тижорат ахборотини) жойлаштириш, бундан рекламанинг ўзини, шунингдек реклама ҳуқуқи асосида эфирга чиқариладиган кўрсатувни намойиш этиш вақти мустасно.  

 Бунда видеоплашка ўлчами экран сатҳининг ўн фоизидан ошмаслиги ва унинг пастки қисмида горизонтал ҳолатда жойлаштирилган бўлиши керак.

Биринчи ва иккинчи қисмларининг талаблари:

- тегишли телеканалда намойиш қилинаётган телекўрсатувлар тўғрисидаги теледастурларда жойлаштириладиган ахборотга;

- теледастурнинг логотипига ва мазкур теледастур ҳақидаги ахборотга нисбатан татбиқ этилмайди.

Радиодаги эшиттиришларда бериладиган рекламаларда қўйидаги тақиқлар белгиланган:

Радиода тарқатилаётган рекламанинг, радиодастурларни реклама билан узиб қўйишнинг умумий давомийлиги эшиттириш вақтининг бир соати давомида йигирма фоиздан, бироқ бир суткада эшиттириш вақтининг ўн беш фоизидан ошиши мумкин эмас. Ушбу талаб эшиттиришлари фақат реклама радиодастурларига ихтисослаштирилган радиоканалларга нисбатан татбиқ этилмайди.

Қуйидагилар тақиқланади:

– реклама жойлаштириш мақсадида давлат тадбирлари ва маросимларининг намойишини узиб қўйиш;

– реклама ва унинг анонси, шу жумладан радиоэшиттиришлар ҳақидаги анонс товушининг баландлиги даражасини реклама ва радиоэшиттиришлар рекламаси ҳақидаги анонс билан узиб қўйилган эшиттириш товушига нисбатан баландроқ қилиб белгилаш.

Реклама — иқтисодиётнинг қон-томири, аммо унинг ўз талаблари мавжуд. Қонунчиликдаги мазкур талаблар орқали бир тарафдан тадбиркорлик учун имконият яратилади, иккинчи тарафдан эса томошабин ва тингловчилар манфаатлари ҳимоя қилинади.

Нигора Раҳмонова, ЎзА