Mamlakatimizda o‘quvchi-qizlarni zamonaviy axborot texnologiyalariga jalb etish masalasiga katta e’tibor qaratilmoqda. Maktabgacha va maktab ta’limi vazirligi hamda “Digital Generation Uzbekistan” nodavlat notijorat ta’lim maskani bilan hamkorlikda tashkil etilayotgan “Raqamli avlod qizlari-2025” loyihasi ko‘pchilik qizlarda, ularning ota-onalarida katta qiziqish uyg‘otmoqda.

Mazkur loyiha haqida kuzatuvchilardan ko‘plab savollar kelib tushmoqda. Xususan, “Raqamli avlod qizlari-2025” da Start-up loyihalar qaysi yo‘nalishlarda qabul qilinadi?

Aytish kerakki, mazkur loyihada ishtirokchilar tomonidan 4 ta yo‘nalishdagi Start-uplar taqdim qilinadi. Bular ta’lim, sun’iy intellekt, yashil iqtisodiyot, iqlim o‘zgarishi kabi yo‘nalishlardir.

“Raqamli avlod qizlari-2025” loyihasida ishtirok etish uchun yosh chegarasi 30 yoshgacha deb belgilangan.

Loyihada ishtirok etish uchun bir jamoa tarkibida faqat 2 ta ishtirokchi qatnashishi mumkin. Shuningdek, loyihada yakka tartibda ishtirok etishga ham ruxsat berilgan.

Aytish kerakki, loyihaning bu yilgi mavsumi 24-29 aprel kunlari bo‘lib o‘tadi. Ayni vaqtda qizlar.raqamliavlod.uz platformasi orqali ro‘yxatdan o‘tish jarayonlari davom etmoqda.

N.Usmonova, O‘zA