Бухоро вилояти божхона бошқармаси томонидан ҳудуддаги экспорт фаолияти билан ажралиб турувчи корхоналарни ўрганиш, уларнинг ташқи иқтисодий алоқаларини янада ривожлантириш ва божхона жараёнларида кўмаклашиш мақсадида қатор тадбирлар амалга оширилмоқда.
Жумладан, “ARTEL ELECTRONICS MANUFACTURING” МЧЖнинг Бухоро шаҳридаги филиалида вилоят божхона бошқармаси масъуллари томонидан ўрганиш ишлари олиб борилди. Тадбир давомида корхонанинг ишлаб чиқариш ва экспорт йўналишидаги салоҳияти батафсил таҳлил қилинди.
Жорий йилнинг ўтган даври мобайнида мазкур корхона томонидан умумий қиймати 8 миллион АҚШ долларига тенг бўлган электроника ва маиший техника буюмлари экспорти божхона режими асосида расмийлаштирилган.
Лойиҳа қиймати 80 миллион долларни ташкил этадиган мазкур корхона йилига 3,3 миллион дона маиший техника ишлаб чиқариш қувватига эга бўлиб, бугунги кунда Қирғизистон, Қозоғистон ва Россия каби давлатларга экспортни йўлга қўйиб улгурган. Бу эса нафақат корхонанинг ўз салоҳиятини намоён этмоқда, балки Бухоро вилоятининг умумий экспорт ҳажмини оширишга ҳам хизмат қилмоқда.
Шунингдек, Бухоро вилояти божхона бошқармаси ташаббуси билан ўтказилган семинарда вилоятда фаолият юритаётган ташқи иқтисодий фаолият қатнашчилари ҳамда кенг жамоатчилик вакиллари иштирок этди. Тадбирнинг асосий мақсади – тадбиркорларга божхона қонунчилигига киритилган сўнгги ўзгартириш ва янгиликларни тушунтириш, уларнинг амалиётда қўлланилишини осонлаштиришга кўмаклашишдан иборат.
Тадбир давомида Ўзбекистон Республикаси Президентнинг 2025 йил 18 апрелдаги “Ишлаб чиқариш, экспорт ва тадбиркорлик фаолиятини рағбатлантириш, савдо ва саноат сиёсати самарадорлигини ошириш чора-тадбирлари тўғрисида”ги фармони ҳамда Вазирлар Маҳкамасининг 2025 йил 19 апрелдаги қарорига мувофиқ белгиланган божсиз олиб кириш тартибларига оид маълумотлар тақдим этилди.
Шунингдек семинарда, “Божхона ҳудудида қайта ишлаш” божхона режимининг имкониятлари ҳам батафсил тушунтирилди. Мазкур режим экспортга йўналтирилган ишлаб чиқариш жараёнларини рағбатлантиришга қаратилган бўлиб, хорижий бозорлар билан алоқаларни кенгайтириш учун кенг йўл очади.
Бу каби тадбирлар божхона органлари ва тадбиркорлик субъектлари ўртасидаги очиқ мулоқотни мустаҳкамлаш, қонунчиликдаги янгиликларни амалиётга самарали жорий этишга хизмат қилмоқда.
Зариф Комилов, ЎзА мухбири.