O‘zbekiston Respublikasi Qurolli Kuchlari tashkil topganligining 33 yilligi hamda “Vatan himoyachilari kuni” bayrami munosabati bilan Qarshi shahri ko‘chalari bo‘ylab harbiy parad bo‘lib o‘tdi.

Erta tongdan Qarshi shahridagi “Mustaqillik” shoh ko‘chasi bo‘ylab viloyatdagi kuch tuzilmalarining harbiy texnika va askarlari saflandi. Dastlab davlatimiz madhiyasi yangradi. So‘ng harbiy orkestr jo‘rligida shoh ko‘cha bo‘ylab tantanali marsh va harbiy parad boshlandi. Mamlakatimizning mudofaa salohiyati ufurib turgan parad, ayniqsa, yoshlarda katta taassurot qoldirdi.  

– Bugun Qarshi shahrida bo‘lib o‘tgan parad menda katta qiziqish uyg‘otdi, – deydi Kasbi tumanilik Rizo Yovqochev. – Ayniqsa, zamonaviy harbiy texnikalarni boshqarayotgan serjantlar, qurol aslahalar ko‘rgazmasi, safda harakatlanayotgan askarlar barcha-barchasi kishiga g‘urur bag‘ishlaydi. Yurtimizning mudofaa salohiyatiga ko‘z tegmasin. Biz yoshlar ham chuqur bilim olib, yurtimiz taraqqiyotiga munosib hissa qo‘shishni maqsad qilganmiz.  

[gallery-21224]

Shundan so‘ng viloyat musiqali drama teatri oldida madaniy dasturlar tashkil etildi. Unda vatanparvarlikni madh etuvchi kuy-qo‘shiqlar, maxsus qo‘shinlar askarlarining chiqishlari barchaga ko‘tarinki kayfiyat ulashdi.  

O‘lmas Barotov, Jamshid Norqobilov (surat), O‘zA muxbirlari