“O‘zmilliybank” AJ avgust oyida “Moliyaviy savodxon mahalla” loyihasi doirasida o‘z o‘quv mashg‘ulotlarini muvaffaqiyatli yakunladi.

Loyiha doirasida “O‘zmilliybank” AJ Toshkent shahrining turli tumanlaridan biriktirilgan kutubxonalarda moliyaviy savodxonlik mashg‘ulotlarini yuqori saviyada o‘tkazdi. Mirobod tumani “Qo‘yliq ota” va “Temiryo‘lchilar” MFY, Olmazor tumani “Paxta” va “Qichqiriq” MFY, Uchtepa tumani “Ko‘kcha Oqtepa” MFY, Chilonzor tumani “Bo‘rijar” MFY, Yunusobod tumani “Xalqabog‘” va “Tiklanish” MFY, Yashnobod tumani “Parvoz” va “Do‘stobod” MFY, Yakkasaroy tumani “Bobur” MFY, Sergeli tumani “Kengmakon” hamda Mirzo Ulug‘bek tumani “Bog‘imaydon” MFY kutubxonalarida o‘tkazilgan tadbirlar shular jumlasidandir.

[gallery-25028]

Mashg‘ulotlar “Pul tarixi va banknotalar” mavzusiga bag‘ishlandi. Ishtirok etgan kichik iqtisodchilar pulning paydo bo‘lish tarixi, banknotalarning yaratilishi, haqiqiy va qalbaki pullarni ajratish usullari haqida qiziqarli ma’lumotlarga ega bo‘ldi, shuningdek, turli mamlakatlar valyutalari bilan yaqindan tanishish imkoniyatiga ega bo‘ldi. Dars jarayonida bolalar o‘rgangan bilimlarini mustahkamlash uchun turli jamoaviy o‘yinlarda ishtirok etdi va o‘zlarini qiziqtirgan savollarga atroflicha javob oldi. Mashg‘ulotlar davomida bolalarning yuzidagi quvonch va ilhom tadbirlarning qanchalik samarali va qiziqarli o‘tganini yaqqol namoyon etdi. Ushbu o‘quv mashg‘ulotlarida 300 nafardan ziyod yoshlar hamda 20 ga yaqin ota-onalar qamrab olindi.

“O‘zmilliybank” AJ uchun bolalarning bilim va savodxonligini oshirishga qaratilgan sa’y-harakatlar bu kelajakka qo‘yilgan eng qimmatli investitsiyadir. Loyiha doirasida o‘tkazilgan tadbirlar orqali yosh avlodning moliyaviy savodxonligini oshirish va ularning iqtisodiy bilimlarini chuqurlashtirishda muhim qadamlar qo‘yildi.

Kamola Yusupova,

Oybek Pardayev (surat),O‘zA