Өзбекстан мен Қазақстан туристік алмасуды кеңейту мәселелерін талқылады
Тәжікстан Республикасының астанасы Душанбе қаласында Өзбекстан Республикасы Туризм комитеті делегациясының ТМД елдерінің өкілдерімен және туризм саласындағы халықаралық жобалар жетекшілерімен бірқатар кездесуі өтті.
Атап айтқанда, Туризм комитеті төрағасының орынбасары Санжар Тожиев Қазақстан Республикасы Туризм және спорт министрлігі жанындағы Туризм индустриясы комитетінің төрағасы Нұрбол Байжановпен кездесті. Кездесуде екі ел арасындағы туристік алмасуды кеңейту, өңіраралық және шекара маңы туризмін дамыту, сондай-ақ Орталық Азияны бірыңғай туристік бағыт ретінде үшінші елдердің нарықтарында бірлесіп ілгерілету мәселелері талқыланды.
Бірлескен таныстырылымдар, туристік форумдар мен ақпараттық турлар ұйымдастыру, сондай-ақ Қазақстанның Түркістан, Қызылорда және Маңғыстау облыстары мен Өзбекстан өңірлері арасында демалыс күндеріне арналған туристік бағыттарды дамыту перспективалары қарастырылды.
Қазақстан тарабына биыл 25-27 қараша күндері Ташкентте өтетін «Жібек жолындағы туризм» – 31-ші Ташкент халықаралық туризм жәрмеңкесіне ұлттық стендпен қатысу жайлы ұсыныс айтылды.
Сонымен қатар ТМД Парламентаралық Ассамблеясы кеңесі хатшылығының өкілі, «Travel Hub «Содружество» халықаралық туристік жобасының жетекшісі Юлия Зайковамен кездесу өтті.
Кездесуде Өзбекстанның ТМД Туризм жөніндегі кеңесіне төрағалық етуі кезеңінде «Travel Hub «Содружество» жобасымен ынтымақтастықты дамыту мәселелері талқыланды. Атап айтқанда, 2027 жыл бойы платформада Өзбекстанның туристік әлеуеті мен салада жүзеге асырылып жатқан жобаларды тұрақты түрде жариялап отыру жөнінде ұсыныстар айтылды.
Кездесулер соңында туристік алмасуды кеңейту, іскерлік байланыстарды нығайту және бірлескен туристік бастамаларды жүзеге асыру бағытындағы ынтымақтастықты жалғастыруға уағдаластыққа қол жеткізілді.
