Poytaxtimizdagi “Yangi O‘zbekiston” bog‘ida duatlon bo‘yicha turli yosh toifalarida o‘tkazilgan O‘zbekiston chempionatida 250 nafar sportchi raqobatlashdi.

Musobaqada ishtirokchilar 20 kilometr velopoyga va 3 km. masofaga yugurish bo‘yicha bahs olib bordi. Unda erkaklar orasida Viktor Zemsev, Andrey Sharipov va A’zamjon Qodirov g‘olib va sovrindorlar qatoridan joy olgan bo‘lsa, ayollar o‘rtasida Viktoriya Morozova, Diana Valiyeva hamda Sevara Choriyeva shohsupaga ko‘tarildi.  

Shuningdek, 13-15 yosh toifalaridagi bahslarda Mubinaxon Botirova, Salohiddin Fayzullayev, 10-12 yoshdagilar o‘rtasida Mohigul Akbarjonova, Abzal Abdurazzoqov, 7-9 yoshlilar bahsida Madina Abdufattohova hamda Makar Panasyuk mamlakat chempioniga aylandi.

Chempionat yakunida g‘olib va sovrindorlar tashkilotchilar tomonidan munosib taqdirlandi.  

Javohir Toshxo‘jayev, O‘zA