Iqtisodiy tadqiqotlar va islohotlar markazi O‘zbekiston avtomobil bozorining joriy yil sentyabr oydagi holatini tahlil qildi. Unga ko‘ra, O‘zbekistonda avtotransport vositalarining umumiy savdosi 110,1 ming donani tashkil etdi, bu o‘tgan oyga nisbatan 1,1 foizga kam.
Faollikning sezilarli pasayishi yillik hisobda 25,5 foiz kuzatilmoqda.
Sentyabr oyida yengil avtomobillar savdosi 0,3 foizga bir oz pasaydi va 101,6 ming donani tashkil etdi.
O‘tgan yilga nisbatan sezilarli pasayish kuzatilmoqda: yengil avtomobillar savdosi 25,5 foizga kamaydi.
Hududlar bo‘yicha yengil avtomobillar savdosi shuni ko‘rsatadiki, sentyabr oyida eng katta pasayish Andijon (9,1 foiz), Qashqadaryo (7,9 foiz) va Toshkent –(7,7 foiz) viloyatlarida qayd etilgan.
Joriy yilning III choragida avtomobillar savdosi 295,6 mingtani tashkil etdi. Shu davrga nisbatan yillik pasayish 26,8 foizni tashkil etdi.
Yengil avtomobillar birlamchi bozorida sotuvlar o‘tgan oyga nisbatan 10,3 foizga oshdi. Bu avvalgi oyga nisbatan qariyb 3,8 mingta avtomobilni tashkil etadi. Yillik ko‘rsatkichlarda faollik barqarorlashmoqda, avgust oyida savdoning pasayishi 1 foiz darajasida bo‘lsa, sentyabr oyida 7,7 foiz o‘sish kuzatildi.
Mahalliy ishlab chiqarilgan yangi avtomobillar savdosi o‘sishda davom etmoqda. Sentyabr oyida sotuvlar 10,8 foizga o‘sib, 37,6 mingta avtomobilni tashkil etdi. Yillik hisobda o‘sish 12 foizni tashkil etdi.
O‘zbekistonda xorijiy yengil avtomobillar bozori o‘sishda davom etdi. Avgust oyida ushbu segmentdagi savdo 25,6 foizga oshgan bo‘lsa-da, sentyabr oyida o‘sish 4,5 foizga sekinlashdi va 3,3 ming donani tashkil etdi.
Yengil avtomobillarning ikkilamchi bozoridagi vaziyat sotuvlar o‘sishining sekinlashishini ko‘rsatdi va sotish hajmining yillik pasayishi tendensiyasini saqlab qoldi.
Xususan, sentyabr oyida avtomobillar ikkilamchi bozoridagi faollik o‘tgan oyga nisbatan 6,3 foizga kamaydi. Hisobot davrida ushbu segmentda 60,5 mingta avtomobil sotilgan. Umuman olganda, yil davomida sotuvlar 38,4 foizga kamaydi.
Yengil elektromobillar vositalari segmenti faollikning oshishini ko‘rsatadi. Sotish hajmi rekord darajada 2,4 baravar oshdi. Bu butun kuzatuv davridagi eng katta o‘sishdir. Sentyabr oyida 4,24 mingta, avgust oyida esa 1,7 ming dona elektromobil sotilgan. Hududlar bo‘yicha savdolarning eng katta o‘sishi Toshkent shahrida (3180 dona), Toshkent (285 dona), Andijon viloyatlarida (119 dona) qayd etildi.
Yillik o‘lchovda elektr transport vositalarining savdosi deyarli 17 foizga oshdi. Shu yilning III choragida yengil elektr transport vositalarini sotish 9,3 mingtani tashkil etdi va o‘tgan yilning shu davriga nisbatan 5,6 foizga kamaydi.
Sh.Mamaturopova, O‘zA