O‘zbekiston milliy teleradiokompaniyasi hamda “O‘zbektelefilm” davlat muassasasi tomonidan ishlangan, Muzaffarxon Erkinov kinorejissyorligida suratga olingan “Puankare” badiiy filmi Bolgariya kino, televideniye va internet Akademiyasi tomonidan bosh mukofoti GRAN-PRIga “Badiiy film uchun eng yaxshi rejissyorlik ishi” yo‘nalishida munosib ko‘rildi.

Shuningdek, “Badiiy film uchun eng yaxshi operatorlik ishi” va “Badiiy film uchun eng yaxshi ssenariy” mukofotlari va  Bolgariya Kino, televideniye va internet Akademiyasi, Yevropa audiovizual san’at assotsiatsiyasi (Bolgariya – S. Makedoniya), Parij Yevropa kino Akademiyasi ESRA Skope audiovizual san’at universiteti (Skope – Parij – Nyu-York) tomonidan kinorejissyor Muzaffarxon Erkinovga “FAXRIY AKADEMIK” unvonini berish hamda uni alohida nishonli diplom bilan taqdirlash to‘g‘risida qaror qabul qilindi.

2024 yilning 11 sentyabrida bo‘lib o‘tadigan kino-telefestivalning Sofiya shahridagi yopilish marosimida yuqorida aytilgan unvon, diplom va boshqa yutuqlar o‘z egalariga topshiriladi.

O‘zA