Rossiya Federatsiyasining Yakutsk shahrida davom etayotgan «Osiyo bolalari» o‘yinlarining dzyudo bahslari ham polvonlarimiz uchun muvaffaqiyatli boshlandi.

Dzyudo musobaqalarining ilk kunida 5 nafar dzyudochilarimiz g‘olib va sovrindorlar safidan joy oldi. Aniqrog‘i, Xushnud Sultonov (-46 kg.), Xushnud Burxonov (-50 kg.) va Muhammadkarim Nozirov (-55 kg.) o‘z vazn toifalarida barcha raqiblarini yengib, oltin medalni qo‘lga kiritdi.

Vazni 40 kilogrammgacha bo‘lgan Dinora Hasanova finalga qadar raqiblari ustidan zafar quchib kumush medalga ega chiqqan bo‘lsa, Dilnoza Hamidova -44 kg.da bronza medaliga sazovor bo‘ldi.

Shu tariqa, dzyudochilarimizning 3 oltin va 1 tadan kumush hamda bronza medallaridan so‘ng, delegatsiyamiz hisobidagi medallar soni 11 ta oltin, 11 ta kumush va 9 ta bronza, jami 31 taga yetdi.

Musobaqa davom etmoqda.

Javohir Toshxo‘jayev, O‘zA