Ona tilimiz jonkuyari, san’at darg‘asi
Ona tilimizning sofligini, xalqona ruhini va milliy qadriyatlarimizni asrashda ustoz san’atkorlarning ham hissasi beqiyos. O‘zbekiston Respublikasida xizmat ko‘rsatgan artist Roza Karimova ona tilimizning o‘ziga xos jozibasi, xalqona ifoda usullari va milliyligimizni asrab-avaylashga munosib hissa qo‘shib kelayotgan fidoyi san’atkorlardan biridir.
O‘zbekiston Davlat satira teatrida ustoz san’atkor Roza Karimova tavalludining 90 yilligiga bag‘ishlangan ijodiy kecha bo‘lib o‘tdi. Mazkur tadbir san’atkorning sermazmun ijodiy yo‘li, milliy teatr san’ati rivojiga qo‘shgan hissasi va xalqimiz qalbidan joy olgan obrazlarini yodga olishga bag‘ishlandi.
O‘zbek san’ati tarixida shunday iste’dod sohiblari borki, ularning ijodi, sahnadagi betakror obrazlari va samimiy kulgisi xalq xotirasida alohida o‘rin egallaydi. Ana shunday san’atkorlardan biri sevimli aktrisamiz Roza Karimovadir.
Roza Karimova haqida so‘z borganda, ko‘pchilikning ko‘z oldida televizion miniatyuralar teatridagi unutilmas sahnalar, hayotiy hajviy lavhalar va Ergash Karimov bilan birgalikdagi chiqishlar gavdalanadi. Ularning ekrandagi ijrosi tomoshabinlarga zavq bag‘ishlab, xonadonlarga kulgi va quvonch olib kirgan. Roza opaning tabiiy ijrosi, obraz yaratish mahorati va o‘ziga xos sahnaviy jozibasi uni muxlislarga yanada yaqin qilgan.
Roza Karimovaning ijodiy faoliyatida televizion miniatyuralar teatri alohida o‘rin tutadi. U kichik hajmli, ammo mazmunan teran va yodda qolarli rollari bilan tomoshabinlar e’tiborini qozongan. Uning ijrosidagi qahramonlar hayotimizda uchraydigan insonlarga shu qadar yaqin ediki, tomoshabinlar ularda o‘z hayotidan lavhalarni ko‘rgandek bo‘lardi. Aktrisa kulgi orqali insonlarning fe’l-atvori, turmushdagi ayrim kamchiliklar va hayotiy haqiqatlarni mahorat bilan ochib berardi. Ayniqsa, 1971-yilda yaratilgan «Uchrashuv» televizion filmidagi ijrosi uning aktrisalik mahoratini namoyon etgan ijodiy ishlaridan biri sifatida yodda qolgan.
Roza opaning ijodiy yo‘li televizion sahnalar bilangina cheklanib qolmagan. U O‘zbekiston Davlat satira teatrida ham faoliyat yuritib, teatr san’ati rivojiga o‘z hissasini qo‘shgan. Sahnadagi tajribasi, hajviy obrazlarni ishonarli gavdalantirishi va tomoshabin bilan til topisha olish mahorati uning serqirra iste’dodini namoyon etgan.
Roza Karimova ijodining yana bir muhim jihati — xalqona til va milliy ifodaga bo‘lgan e’tibori. Uning qahramonlari orqali xalqimizning turmush tarzi, muomala madaniyati, hazil-mutoyibaga moyilligi va o‘ziga xos dunyoqarashi namoyon bo‘ladi. Zero, ona tilining boyligini sahnada jonli namoyon etish, uning tabiiyligi va xalqchilligini avlodlarga yetkazish ham katta san’at.
Hajv san’ati kuldirish orqali o‘ylantirish, oddiy voqealar ortidagi haqiqatni ko‘rsata bilish san’atidir. Roza Karimova aynan shu jihatlari bilan tomoshabinlar mehrini qozongan. Uning ijodiy hamkorliklari, sahnadagi samimiyati va san’atga bo‘lgan sadoqati o‘zbek teatri hamda televideniyesi tarixida o‘ziga xos iz qoldirgan.
Ijodiy kechada Roza Karimovaning milliy teatr san’atimiz ravnaqiga qo‘shgan hissasi, yaratgan obrazlari va ko‘p yillik ijodiy faoliyati haqida batafsil so‘z yuritildi. Ustoz san’atkorning ijodiga bag‘ishlangan xotiralar, samimiy e’tiroflar va ezgu tilaklar tadbirga alohida fayz bag‘ishladi.
Bunday uchrashuvlar nafaqat ustozlarga hurmat ifodasi, balki yosh avlod uchun ham katta ibrat maktabidir. Zero, milliy san’atimiz ravnaqiga umrini bag‘ishlagan ijodkorlarni e’zozlash, ularning boy tajribasi va ma’naviy merosini asrab-avaylash barchamizning burchimiz.
Roza Karimova – xalqona san’at, samimiy kulgi va milliy qadriyatlar targ‘ibotiga munosib hissa qo‘shgan ijodkor. Uning san’atga sadoqati, ona tilimizga bo‘lgan e’tibori va tomoshabinlarga ulashgan quvonchi barchamiz uchun qadrli. Ustoz san’atkorlar bor ekan, milliy san’atimiz an’analari, ona tilimizning jozibasi va xalqona ruhimiz hamisha yashayveradi.
N.Usmonova,
O‘zA
