O‘zbekiston Respublikasi Prezidenti “Oila va xotin-qizlarni qo‘llab-quvvatlash tizimini yanada takomillashtirish chora-tadbirlari to‘g‘risida” qaror qabul qildi.
Unga muvofiq, 2025 yilda xotin-qizlarni qo‘llab-quvvatlashning asosiy maqsadli ko‘rsatkichlari belgilandi. Ular quyidagilardan iborat:
a) 2 million nafar xotin-qizlarning bandligini ta’minlash;
b) 250 ming nafar xotin-qizlarni kasb-hunar va tadbirkorlikka o‘qitish;
v) 250 ming nafar xotin-qizlarni oliy ta’lim bilan qamrab olish;
g) 50 ming nafar ehtiyojmand xotin-qizlarni sanatoriylarda sog‘lomlashtirish hamda ularda tadbirkorlik ko‘nikmalarini shakllantirish bo‘yicha motivatsion seminarlar tashkil etish.
"HAMROH" tadbirkor ayollarni qo‘llab-quvvatlash dasturi doirasida 2025 yil 1 maydan boshlab:
a) xotin-qizlarga "yashil loyihalar" va IT sohasidagi loyihalarni amalga oshirishiga, shuningdek, kamida 5 nafar xotin-qizning tadbirkorligini yo‘lga qo‘yishga ko‘maklashgan 1ming nafar “ustoz” tadbirkorlarga 50 million so‘mgacha grant ajratish yo‘lga qo‘yiladi;
b) ijobiy kredit tarixiga ega bo‘lgan xotin-qizlarga 100 mln so‘mgacha garovsiz kredit ajratiladi;
v) ayol tadbirkorlar tomonidan kredit hisobidan sotib olinayotgan asbob-uskunalar yetkazib berilgunga qadar "Tadbirkorlikni rivojlantirish kompaniyasi" AJ tomonidan kafillik taqdim etilishi yo‘lga qo‘yiladi.
Qarorga ko‘ra, "Loyihalar fabrikasi" platformasi negizida "Tadbirkor ayollar" platformasi 2025 yil 1 iyulga qadar ishga tushiriladi.
Platforma:
a) ayol tadbirkorlarga xomashyo sotib olishga ko‘maklashish;
b) o‘zaro kooperatsiyani kengaytirish va mahsulotlarni sotish uchun bozor topish;
v) zarur mutaxassislarni izlash va ishga qabul qilish;
g) loyihalar doirasida yuzaga kelayotgan muammolarini aniqlash va ularga yechim topish imkonini beradi.
Savdo-sanoat palatasi 2025 yil 1 maydan boshlab "Hamkor tadbirkor" dasturini yo‘lga qo‘yadi. Dastur o‘z biznesini tashkil etmoqchi bo‘lgan xotin-qizlarda tadbirkorlik ko‘nikmalarini shakllantirish, kooperatsiya asosida xotin-qizlarning tadbirkorlik faoliyatini yo‘lga qo‘yishga ko‘maklashish, mahalliy va xalqaro elektron platformalarda xotin-qizlarga o‘z mahsulotlarini joylashtirish va sotishga ko‘maklashishni nazarda tutadi.
O‘zA