Oila va xotin-qizlar qo‘mitasining 9 oylik faoliyati sarhisob qilindi
Oila va xotin-qizlarni qo‘llab-quvvatlash, oilalarda sog‘lom muhitni mustahkamlash, xotin-qizlarning huquq va manfaatlarini himoya qilish hamda ularning jamiyatdagi faolligini oshirish borasida amalga oshirilayotgan ishlar izchil davom etmoqda.
Joriy yilning o‘tgan to‘qqiz oyida ushbu yo‘nalishlarda bajarilgan ishlar, erishilgan natijalar va mavjud muammolar atroflicha tahlil qilindi.
O‘zbekiston Respublikasi Bosh vaziri o‘rinbosari — Oila va xotin-qizlar qo‘mitasi raisi Dilnoza Kattaxonova rahbarligida markaziy apparat, hududiy boshqarmalar, shuningdek, 208 ta tuman va shahar mas’ullari ishtirokida hisobot davri yakunlariga bag‘ishlangan yig‘ilish bo‘lib o‘tdi. Unda amalga oshirilgan ishlar tanqidiy tahlil qilinib, kelgusidagi ustuvor vazifalar belgilab olindi.
Hisobot davrida xotin-qizlarni ijtimoiy qo‘llab-quvvatlash, ularning muammolarini joyida hal etish va oilalardagi ijtimoiy-ma’naviy muhitni yaxshilash borasida muayyan natijalarga erishildi. Jumladan, «Ayollar daftari» orqali 1 million 3 ming nafar ehtiyojmand xotin-qizga manzilli yordam ko‘rsatildi. Bu orqali ijtimoiy himoyaga muhtoj ayollarning ehtiyojlarini aniqlash va ularni qo‘llab-quvvatlashga qaratilgan ishlar amalga oshirildi.
Mahallalarda oilalar bilan olib borilgan tizimli ishlar natijasida 34 ming 638 ta oiladagi nizolar bartaraf etildi. Shuningdek, 8,7 mingdan ortiq oilaning qonuniy nikohi rasmiylashtirildi. Mazkur natijalar oilaviy munosabatlarni mustahkamlash, nikohning huquqiy asoslarini ta’minlash va oilalardagi muammolarni o‘z vaqtida hal etish muhimligini ko‘rsatadi.
Xotin-qizlar tomonidan sodir etilishi mumkin bo‘lgan jinoyatlar ko‘rsatkichining 20,7 foizga kamaygani ham hisobot davrida qayd etilgan natijalardan biri bo‘ldi. Bu yo‘nalishda profilaktika ishlarini kuchaytirish, xotin-qizlar bilan individual ishlash va ularni qiynayotgan muammolarga yechim topish masalalari dolzarb ahamiyat kasb etadi.
Fuqarolar murojaatlari bilan ishlash samaradorligi ham yig‘ilishda alohida ko‘rib chiqildi. Qo‘mitaga kelib tushgan 39 ming 975 ta murojaatning 32 ming 955 tasi ijobiy hal etilgan. Bu borada murojaatlarni o‘z vaqtida ko‘rib chiqish, har bir holatni alohida o‘rganish va fuqarolarning muammolariga aniq yechim topish muhim vazifa sifatida belgilandi.
Yig‘ilishda erishilgan yutuqlar bilan bir qatorda, hududlarda saqlanib qolayotgan kamchiliklar ham tanqidiy muhokama qilindi. Xususan, takroriy murojaatlar, erta nikoh va erta tug‘ruq holatlari, oilaviy ajrimlar hamda xotin-qizlar bandligini ta’minlash bilan bog‘liq muammolarga alohida e’tibor qaratildi.
Qayd etilganidek, mazkur masalalarni samarali hal etish uchun mas’ul tashkilotlar o‘rtasidagi hamkorlikni kuchaytirish, muammolarning kelib chiqish sabablarini chuqur o‘rganish va profilaktik choralarni o‘z vaqtida ko‘rish zarur. Ayniqsa, oilaviy nizolarning oldini olishda mahalla, oila va tegishli mutaxassislarning hamjihatlikda ishlashi muhim ahamiyatga ega.
Erta nikoh va erta tug‘ruqlarning oldini olish masalasida ham tushuntirish ishlarini kuchaytirish, ota-onalarning mas’uliyatini oshirish va yoshlarni oilaviy hayotga tayyorlashga qaratilgan chora-tadbirlarni izchil davom ettirish zarurligi ta’kidlandi. Shuningdek, oilaviy ajrimlarning oldini olishda muammolarni dastlabki bosqichda aniqlash va oilalarga amaliy yordam ko‘rsatish muhim ekani qayd etildi.
Xotin-qizlar bandligini ta’minlash ham ustuvor yo‘nalishlardan biri sifatida belgilandi. Bu borada ayollarning kasb-hunar egallashi, mehnat bozorida munosib o‘rin topishi va iqtisodiy mustaqilligini mustahkamlashiga ko‘maklashishga alohida e’tibor qaratish lozimligi ta’kidlandi. Zero, iqtisodiy barqarorlik xotin-qizlarning ijtimoiy faolligini oshirish va oilalar farovonligini ta’minlashda muhim omil hisoblanadi.
Yig‘ilishda har bir murojaatga yuzaki yondashmasdan, uning zamiridagi muammoni aniqlash va amaliy yechim topish zarurligi alohida uqtirildi. Mas’ul rahbarlarning shaxsiy javobgarligini oshirish, belgilangan vazifalar ijrosini muntazam nazorat qilish hamda aholi bilan manzilli ishlash tizimini takomillashtirish bo‘yicha vazifalar belgilandi.
Shuningdek, elektron «Xotin-qizlar balansi» asosida har bir ayolning ijtimoiy holati, ehtiyojlari va muammolarini individual o‘rganishga ustuvor ahamiyat qaratish zarurligi ta’kidlandi. Mazkur yondashuv xotin-qizlarga ko‘rsatilayotgan yordamning manzilliligini ta’minlash, mavjud imkoniyatlardan samarali foydalanish va muammolarni barvaqt aniqlashga xizmat qilishi ko‘zda tutilgan.
N.Usmonova,
O‘zA
