NASA "Artemida-2" ой миссияси учун тескари саноқни бошлади (+видео)
"Orion" космик кемасининг парвози АҚШ Шарқий соҳили вақти билан 1 апрел куни соат 18:24 га (Тошкент вақти билан 2 апрель тонгига) режалаштирилган. Ўн кунлик миссия доирасида тўрт нафар астронавт Ер йўлдоши атрофини айланиб ўтиш ва ортга қайтиш учун сафарга чиқади.
NASA “Артемида” дастури ҳақида 2019 йилда эълон қилганди. Унинг мақсади АҚШнинг Ойга қайтишини таъминлаш бўлиб, бу мунтазам бошқариладиган миссияларни амалга ошириш ва Марсга парвозлар учун транзит базасини барпо этишни назарда тутади.
Флоридадаги Кеннеди номидаги космик марказнинг учиш майдончасига "SLS" ракета-ташувчиси ва "Orion" кемаси 20 март куниёқ ўрнатилган эди. Экипаж таркибидан Рид Уайзман, Жереми Хансен, Кристина Кох ва Виктор Гловер жой олган. Гловер ой миссиясида қатнашадиган илк афроамерикалик, Кох эса биринчи аёл астронавт бўлади.
Аслида парвоз 2026 йилнинг мартига мўлжалланган эди, бироқ 21 февраль куни NASA техник сабабларга кўра, ракетанинг гелий етказиб бериш тизимидаги носозликлар туфайли стартни номаълум муддатга қолдирган эди. Бу Қўшма Штатларнинг янги ой дастуридаги иккинчи босқич ҳисобланади. Кейинги босқичда, орадан 50 йилдан кўпроқ вақт ўтиб, инсонлар яна Ой юзасига қадам қўйиши кутилмоқда. NASA’нинг якуний мақсади эса Марсга парвозлар учун ойда база қуришдир.
<iframe width="650" height="420" src="https://www.youtube.com/embed/-HPkbkJKHP8" title="NASA "Artemida-2" oy missiyasi uchun teskari sanoqni boshladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Муҳайё Турдалиева, Улуғбек Тўхтаев, ЎзА
