Namangan — yangi taraqqiyot va bunyodkorlik manzaralari

FOTOGALEREYA

Mustaqillik yillarida Namangan viloyatida amalga oshirilgan keng ko‘lamli islohotlar hudud hayotining barcha jabhalarida o‘z ifodasini topmoqda. Yangidan qad rostlayotgan inshootlar, zamonaviy korxonalar, obod mahallalar, o‘zgarayotgan shahar va qishloqlar, eng muhimi, mehnati va tashabbusi bilan yangiliklar yaratayotgan insonlar bugungi Namanganning yangi qiyofasini namoyon etmoqda.

So‘nggi yillarda shahar va tumanlarda zamonaviy inshootlar, yangi korxona va ishlab chiqarish majmualari, ijtimoiy ob’ektlar hamda qulay infratuzilma barpo etilmoqda. Obod mahallalar, yangilangan ko‘chalar, zamonaviy turar joylar va xizmat ko‘rsatish maskanlari aholi uchun yanada qulay muhit yaratyapti.

Namangan sanoat salohiyati yuqori hudud sifatida iqtisodiy taraqqiyotda muhim o‘rin tutadi. Viloyatda sanoatni diversifikatsiya qilish, zamonaviy texnologiyalarga asoslangan ishlab chiqarishni kengaytirish, mahalliy xomashyoni chuqur qayta ishlash va raqobatbardosh mahsulotlar ishlab chiqarishga qaratilgan loyihalar amalga oshirilmoqda. Yangi korxonalarning ishga tushirilishi esa ish o‘rinlari va yangi imkoniyatlar demakdir.

Tadbirkorlik muhitining kengayishi ham hudud iqtisodiy hayotida muhim ahamiyat kasb etmoqda. Kichik biznes va xususiy tadbirkorlik vakillari yangi g‘oya va tashabbuslari bilan ishlab chiqarish, xizmat ko‘rsatish, eksport va bandlik sohalariga munosib hissa qo‘shmoqda.

[gallery-30966]

Viloyat iqtisodiyotining yana bir muhim tayanchi — qishloq xo‘jaligi. Yer va suv resurslaridan samarali foydalanish, zamonaviy agrotexnologiyalarni joriy etish, intensiv bog‘ va issiqxonalar barpo etish, mahsulotni qayta ishlash hamda saqlash imkoniyatlarini kengaytirish borasidagi ishlar tarmoqning salohiyatini oshirmoqda. Dalalardagi mehnat, yetishtirilgan hosil va qayta ishlash jarayonlari esa farovonlikning muhim manbalaridan birini namoyon etadi.

Taraqqiyotning mazmun-mohiyati inson hayotidagi o‘zgarishlar bilan belgilanadi. Shu bois ta’lim va ilm-fan, tibbiyot, sport, madaniyat va ijtimoiy sohalardagi yangilanishlar alohida ahamiyatga ega. Zamonaviy bilim olayotgan yoshlar, ilm bilan shug‘ullanayotgan tadqiqotchilar, bemorlar salomatligi yo‘lida mehnat qilayotgan shifokorlar, sport maydonlarida yurtimiz sharafini munosib himoya qilishga intilayotgan yoshlar — Namanganning yangi avlodini shakllantirmoqda.

Inson qadrini yuksaltirishga qaratilgan sa’y-harakatlar ijtimoiy hayotning turli jabhalarida o‘z ifodasini topmoqda. Aholiga sifatli xizmat ko‘rsatish, kasb-hunar o‘rganish va mehnat qilish uchun sharoit yaratish, xotin-qizlar va yoshlarni qo‘llab-quvvatlash borasidagi ishlar jamiyat hayotidagi muhim o‘zgarishlarga zamin yaratmoqda.

Namanganning boy tarixi, milliy hunarmandchilik an’analari va betakror tabiati turizmni rivojlantirish uchun ham keng imkoniyatlar ochmoqda. Chustning dunyoga mashhur pichoqchilik va hunarmandlik maktabi, Yangiqo‘rg‘onning so‘lim tabiati, tarixiy qadamjolar va etnografik meros hududning sayyohlik salohiyatini yanada oshirmoqda. Milliy qadriyatlar va zamonaviy yondashuv uyg‘unligi esa bu yo‘nalishda yangi istiqbollarni belgilamoqda.

Bugun Namangan — sanoat va tadbirkorlik, ilm-fan va ta’lim, zamonaviy tibbiyot va sport, qishloq xo‘jaligi va turizm, bunyodkorlik va obodlik uyg‘unlashgan taraqqiyot makoni. Bu jarayonlarning barchasini bir nuqtada birlashtirib turgan kuch esa insonning mehnati, tashabbusi va ertangi kunga ishonchidir.

Mustaqillikning 35 yilligi arafasida Namangan viloyatining bugungi qiyofasi ana shunday — o‘zgarishlar bilan boyigan, yangi imkoniyatlarga intilayotgan, salohiyatini tobora keng namoyon etayotgan va kelajak sari dadil odimlayotgan zamonaviy hudud.

Hotam MAMADALIEV (surat), O‘zA