Sirdaryo viloyatida tashkil etilgan "Bo‘sh ish o‘rinlari" yarmarkasida 137 nafar fuqaro ishga joylashtirildi. Shuningdek, 48 nafar yosh kasb-hunar o‘rganishga, 18 nafari esa xorijiy ish beruvchilar bilan suhbatga yo‘naltirildi.

Sirdaryo viloyat hokimligi hamda viloyat prokuraturasi tashabbusi bilan o‘tkazilgan yarmarkada 150 dan ortiq korxona va tashkilot 2 000 ga yaqin bo‘sh ish o‘rnini taklif qildi.

Shuningdek, fuqarolarga kasb-hunarga o‘qitish, tadbirkorlik faoliyatini boshlash, imtiyozli kreditlar hamda xorijda rasmiy ishlash imkoniyatlari haqida batafsil ma’lumotlar berildi.

Tadbir davomida 24 nafar fuqaroga tijorat banklari tomonidan asbob-uskunalar olishda ko‘mak ko‘rsatildi, 16 nafar shaxsga esa imtiyozli kreditlar ajratildi. Shuningdek, Kasbiy ko‘nikmalar markazi bitiruvchilariga rasmiy sertifikatlar topshirildi.

G‘ulom Primov, O‘zA muxbiri