МДҲ иштирокчи давлатлари адлия вазирликлари ҳамкорлигига оид битим имзоланди
Ереван шаҳрида МДҲ Адлия вазирлари кенгашининг 20-мажлиси бўлиб ўтди.
Унда Арманистон, Беларусь, Россия, Тожикистон ва Ўзбекистон адлия вазирлари, Қирғизистон Республикаси адлия вазирининг биринчи ўринбосари, МДҲ Ижроия қўмитаси вакиллари ҳамда нотариат ва адвокатура бўйича таянч ташкилотлар раҳбарлари қатнашди.
Мажлисда Арманистоннинг 2026 йилда кенгашдаги раислиги якунлари, ФҲДЁ органлари методик кенгашини ташкил этиш, адлия органлари фаолиятини рақамлаштириш масалалари муҳокама қилинди.
Ўзбекистон адлия вазири Акбар Тошқулов мамлакатимиз адлия соҳасидаги ислоҳотлар, электрон ҳуқуқий хизматлар ва сунъий интеллектни жорий этиш тажрибаси ҳақида сўзлаб берди.
Бундан ташқари, Адлия вазирлиги ташаббуси билан ишлаб чиқилган МДҲ адлия вазирликлари ўртасида ахборот алмашиш ягона электрон тизими концепцияси бўйича "йўл харитаси" доирасида амалга оширилган ишлар юзасидан маълумот берилди.
Мажлис якунида кенгаш эмблемаси ва "МДҲга аъзо давлатларда ҳуқуқий маърифат йили - 2027" рамзлари тасдиқланди.
Кенгашнинг 2027 йилга мўлжалланган тадбирлар режаси қабул қилинди. Режага 2027 йил май ойида Тошкентда ўтказиладиган Tashkent Law Spring" халқаро юридик форуми ҳам киритилди.
МДҲ иштирокчи давлатлари адлия вазирликларининг ҳамкорлиги тўғрисидаги битим имзоланди. Мазкур Битим қонунчилик фаолияти, ҳуқуқий ахборот, аҳолига ҳуқуқий ёрдам кўрсатиш, кадрлар тайёрлаш ва уларнинг малакасини ошириш соҳаларида ҳамкорликни кучайтиришга қаратилган.
Н.Абдураимова, ЎзА
