3-15 dekabr kunlari Respublika Ma’naviyat va ma’rifat markazi, O‘zbekistondagi Islom sivilizatsiyasi markazi, O‘zbekiston mahallalari uyushmasi hamda bir qator hamkor tashkilotlar tomonidan Qoraqalpog‘iston va yurtimizning barcha hududlarida “Ma’rifat karvoni” ilmiy-ma’rifiy va madaniy targ‘ibot tadbirlari bo‘lib o‘tadi.

“Ma’rifat karvoni” tadbirlari doirasida hududlarda yangi islohotlarning mazmuni, “O‘zbekiston – 2030” strategiyasining ahamiyati va milliy-mafkuraviy g‘oyalar keng targ‘ib qilinadi. Tadbirlarda mahalliy olimlar, ziyolilar, yoshlar, san’at va madaniyat namoyondalari hamda faol mahalla a’zolari ishtirok etishi rejalashtirilgan.  

Tadbirlarda buyuk ajdodlar merosini asrash va ommalashtirish, millatlararo totuvlik va bag‘rikenglik g‘oyalarini rivojlantirish bo‘yicha faol ish olib borildi. Shuningdek, ishtirokchilar uchun O‘zbekistonning milliy-mafkuraviy islohotlarini tushuntiruvchi muloqot platformalari yaratildi.  

Loyiha doirasida, xorijdagi vatandoshlar bilan “El-yurt umidi” jamg‘armasi hamkorligida madaniy-ma’rifiy tashabbuslar amalga oshirildi. Bu tadbirlar Islom sivilizatsiyasi markazi, Imom Buxoriy va Imom Moturidiy xalqaro ilmiy-tadqiqot markazlarining jamiyatimizdagi o‘rnini ilmiy asosda tushuntirishga xizmat qiladi.  

“Ma’rifat karvoni” tadbirlari aholini, ayniqsa, yoshlarni buzg‘unchi g‘oyalardan himoya qilish, ularning milliy o‘zligini anglashida muhim ahamiyat kasb etmoqda.  

Mazkur loyiha mamlakatimizdagi innovatsion g‘oyalar va kreativ iqtisodiyot rivoji uchun mustahkam asos yaratayotganini yana bir bor namoyon etdi.  

Sherali Otaboyev, O‘zA