Жорий йилнинг 5 февраль куни Киночилар уйида Кинематография агентлиги буюртмасига биноан “Бухорийлар” МЧЖ томонидан суратга олинган “Ким деяй сени?” бадиий фильмининг ёпиқ намойиши бўлиб ўтди.

Унда ОАВ вакиллари, ижодкорлар, мутахассислар ва ёшлар иштирок этди.  

Мазкур фильмда инсоннинг кексалик даври, бутун умри давомида орттирган тажрибаси ва ўз маънавий бойлигини ёшларга топшириш масъулияти мавзуси ифода этилади.  

Кинокартина сценарий муаллифи ва постановкачи режиссёр Қамара Камолова, постановкачи оператор Оскар Бахтиев, постановкачи рассом Беҳзод Назаров, гримёр Дилшода Тилавова, либослар бўйича рассом Ирина Литвиненко.  

Намойиш якунида ОАВ вакиллари ҳамда мутахассислар иштирокида фильм муҳокамаси бўлиб ўтди.  

Маълумот ўрнида, Ўзбекистон Республикаси санъат арбоби, кинорежиссёр Қамара Камолова энг биринчи ўзбек аёл режиссёри бўлиб, фильмлари кўплаб миллий ва халқаро мукофотлар билан тақдирланган.  1994 йил – “Атроф оппоқ қорга бурканган” Нант (Франция)да бўлиб ўтган 3 минтақавий ХКФ да ҳакамнинг махсус совринини қўлга киритган. 2005 йилда ишланган “Йўл бўлсин” фильми 2007 йили Олма-Ота шаҳрида бўлиб ўтган "Евроосиё" кинофестивалида "Энг яхши режиссёрлик иши" номинацияси бўйича ғолиб бўлган.  

Эслатиб ўтамиз, тез орада “Ким деяй сени?” кинокартинасининг катта премьераси ҳамда юртимиз кинотеатрларидаги намойишлари ташкил этилади. Шунингдек, Кинематография агентлиги томонидан режиссёр Рустам Саъдиевнинг “Барон 2”, Дилмурод Масаидовнинг “Аёл қисмати”, Жамилахон Пўлатованинг “Аёл қалби” каби кинофильмларнинг премьералари ўтказилади. 

Кинематография агентлиги Ахборот хизмати 
 

ЎзА.