![](https://cdn.uza.uz/2022/08/08/10/27/xrIk6yTyexaOFg7XtuFgtLX8acuIdyWn_normal.jpg)
"O‘zbekiston MET" AJ matbuot xizmati xabariga ko‘ra, bugun o‘tkazilgan ishchi tartibdagi videoselektor yig‘ilishida 2022-2023 yil kuz-qish mavsumiga tayyorgarlik ishlarini boshlash yuzasidan topshiriqlar berildi.
Bu borada berilgan ko‘rsatmalarga binoan mavsumiy ta’mirlash-sozlash ishlari dastlab qo‘shni respublikalar hududidan kesib o‘tgan 220-500 kV kuchlanishli elektr tarmoqlarini ko‘rikdan o‘tkazishdan boshlanadi.
Ularda aniqlangan kamchiliklarni bartaraf etish, eskirgan uskuna va jihozlarni yangilash, ta’mirlash-sozlash, shuningdek, qo‘shimcha tarzda qushlar qo‘nishidan himoya moslamalarini o‘rnatish, tayanch ustunlarining mustahkamligini ta’minlash va boshqa texnik-muhandislik amaliyotlari orqali boshlanadi.
Eslatib o‘tamiz, O‘zbekistonning Qozog‘iston, Tojikiston, Qirg‘iziston va Turkmaniston hududidan o‘tuvchi magistral elektr tarmoqlari mavjud bo‘lib, ularning barqaror faoliyati mamlakatimiz elektr ta’minoti ishonchliligini oshirishga xizmat qiladi.
O‘zA