Mahalla va oilani qo‘llab-quvvatlash vazirining birinchi o‘rinbosari Gulnora Ma’rufova sohaning tegishli mas’ullari bilan Uchtepa tumani “Ko‘kcha Oqtepa” mahallasidagi kasb-hunar kolleji binosida ochilishi mo‘ljallanayotgan tuman “Ayollar maslahat markazi”da bo‘ldi.

Markaz faoliyatini yo‘lga qo‘yish uchun 7 ta xona ajratilgan. Ular zamonaviy talablar asosida ta’mirlanib, zaruriy jihozlar bilan ta’minlanmoqda.

Shuningdek, vazir o‘rinbosari “Qor yog‘di” mahallasida bo‘ldi. Bu yerda  mahalla fuqarolar yig‘ini raisi va o‘rinbosarlari bilan xotin-qizlarni tizimli qo‘llab-quvvatlash borasidagi ishlarni yanada jaddallashtirish yuzasidan muloqot o‘tkazildi.

Mahalla fuqarolar yig‘inlarida xotin-qizlarning huquq va qonuniy manfaatlarini himoyalash, ularning iqtisodiy, ijtimoiy va siyosiy faolligini oshirish, bandligini ta’minlash, tadbirkorlikka keng jalb etish muhimligiga e’tibor qaratildi.

 Shu bilan birga ehtiyojmand xotin-qizlarni ijtimoiy qo‘llab-quvvatlash, oila institutini mustahkamlashga oid ishlar samaradorligini oshirish, gender tenglikni ta’minlash borasidagi  islohotlarni izchil davom ettirish bo‘yicha taklif va tavsiyalar berildi.

Mahalla va oilani qo‘llab-quvvatlash vazirining birinchi o‘rinbosari G.Ma’rufova o‘ta dolzarb hisoblangan “Ayollar daftari”ning 3-bosqichi bo‘yicha ro‘yxat shakllantirishda hech bir ehtiyojmand ayol e’tibordan chetda qolmasligi kerakligini alohida ta’kidladi.

Muloqot davomida xotin-qizlar tomonidan eng ko‘p bo‘layotgan murojaatlar, ya’ni uy-joy, aliment, ajrim va uning oldini olish masalalari bo‘yicha ko‘plab masalalar muhokama qilindi. Ularni hal etish yo‘llari belgilandi.

O‘zA