Bolgariya televideniye, kino va internet kommunikatsiyalari akademiyasi tomonidan tashkil etilgan “Slavyan ertagi” XII xalqaro kinofestivalining tantanali taqdirlash marosimi bo‘lib o‘tdi.

O‘zbekiston Kinoarboblari ijodiy uyushmasi Boshqaruv kengashi a’zosi, kinorejissyor Muzaffarxon Erkinov “Puankare” badiiy filmi uchun kino-telefestivalning bosh sovrini – Gran-Pri (“Badiiy film uchun eng yaxshi rejissyorlik ishi” nominatsiyasi) bilan taqdirlandi.  

Shuningdek, film bosh operatori Ravshan Mirzakamolov “Badiiy film uchun eng yaxshi operatorlik ishi” va film ssenariy muallifi Abduqayum Yo‘ldoshev “Badiiy film uchun eng yaxshi ssenariy” nominatsiyalarida g‘olib deb topildi.

Qolaversa, Bolgariya Kino, televideniye va internet akademiyasi, Yevropa audiovizual san’at assotsiatsiyasi (Bolgariya – Makedoniya), Parij Yevropa kino akademiyasi Skope audiovizual san’at universiteti tomonidan Muzaffarxon Erkinovga kinoakademiyalarning “Faxriy akademik” va "Honoris causa" unvonlari hamda alohida nishonli diplom topshirildi.

N.Usmonova,

O‘zA