Кемалар хавфсизлик кафолатисиз Ҳурмуз бўғози орқали ўтишдан бош тортмоқда
АҚШ Президенти Дональд Трамп Ҳурмуз бўғозига кириш ва чиқишга уринаётган барча кемалар қамал қилинишини айтган.
Кема эгалари ва брокерлар АҚШ ва Эрон ҳаракат хавфсизлигини кафолатламагунча, Ҳурмуз бўғозидан ўтишдан бош тортмоқда, деб хабар тарқатди “The Wall Street Journal” манбаларга таяниб.
Маълумки, Америка етакчиси АҚШ денгиз флотига Эронга бўғоздан ўтиш учун пул тўлаган барча кемаларни кузатиб бориш ва тўхтатиш бўйича ҳам кўрсатма берган. Марказий қўмондонлик эса “Эрон портларига кирадиган ва чиқадиган ҳар қандай денгиз транспорти воситаси” қамал қилинишини таъкидлаган.
– Президент Трампнинг Ҳурмуз бўғозини қамал қилиш режаси халқаро юк ташишдаги ноаниқликни кучайтирмоқда, – дея қўшимча қилган газета.
Масалан, Хитой ва Сингапурдаги мижозларга юкни ортиш учун Форс кўрфазига киришни кутаётган тўрт кемаси бор юнон кема эгаси бир неча кун кутиши, агар Ҳурмузга қарши таҳдид давом этса, кемалар ортга қайтишини айтган.
Газета таъкидлашича, энди кемалар соҳиби ҳудуддан ўтиш учун иккала томон билан ҳам музокара олиб бориши керак. Шунга қарамай, хавфсизлик борасида барибир аниқлик йўқ.
Нашр хабар беришича, “China COSCO Shipping” компаниясига тегишли икки супер танкер Трампнинг бўғозни тўсиб қўйиш ҳақидаги эълонидан кўп ўтмай, сув йўлини кесиб ўтган. Бўғоздан ўтиши режалаштирилган яна беш компания танкери эса ҳозир тиқилиб қолган ва вазият аниқланмагунча, Ҳурмуздан ўтишга уринмайди, деган корхона раҳбари газетага.
С.Раҳимов, ЎзА
