Жўқорғи Кенгес раиси футболчилар билан учрашди
Қорақалпоғистон Республикаси Жўқорғи Кенгеси раиси Аманбай Оринбаев “Арал” футбол жамоаси аъзолари билан учрашди.
Унда Жўқорғи Кенгес раиси Президентимиз раҳбарлигида спортни, шу жумладан футболни ривожлантириш ва оммалаштириш бўйича амалга оширилаётган кенг кўламли ишларга тўхталиб ўтди ва муҳим ўйин олдидан жамоа аъзоларига омад тилади.
Таъкидлаш жоизки, бугунги кунда Про-лигада ўйнаётган “Арал” футбол жамоаси олдида муҳим ўйин кутмоқда. Яъни, 16 декабрь куни Суперлигада ўйнаш йўлланмаси учун Бухоро вилоятининг “Бухоро” жамоаси билан ўйин ўтказилади. Албатта, ушбу ўйинда футбол мухлислари ўз жамоасидан юқори натижалар кутиб қолади.
Шуни ҳам алоҳида таъкидлаш керакки, “Арал” футбол жамоаси мазкур ўйинда ғалаба қозонса, 24 йиллик танаффусдан сўнг узоқ кутилган Суперлигада ўйнаш имкониятини қўлга киритади.
Довуд Абибуллаев, ЎзА мухбири
