Жанубий Кореянинг собиқ президенти апелляция судида якуний баёнот беради
Жанубий Корея собиқ президенти Юн Сок Ёл иши бўйича Сеул апелляция судининг якуний мажлиси бошланди. Одил судловга тўсқинлик ва бошқа жиддий айбловлар Ёлнинг сиёсий келажагига нуқта қўйиши мумкин.
Сеул апелляция суди одил судловга тўсқинлик қилиш ва мамлакатда қисқа муддатли ҳарбий ҳолат жорий этиш билан боғлиқ жиноятларда айбланаётган Жанубий Кореянинг собиқ президенти Юн Сок Ёл иши бўйича якуний суд мажлисини бошлади, деб хабар бермоқда “Yonhap” ахборот агентлиги.
Апелляция Юн Сок Ёлнинг ўзи ва махсус прокурор Чо Эн Сук жамоаси биринчи инстанция судининг беш йиллик қамоқ жазоси устидан шикоят қилганидан кейин бошланган.
Маълумки, жорий йил январь ойида собиқ президент ҳибсга олишга тўсқинлик қилганликда ва ҳарбий ҳолат режаси бўйича йиғилишга фақат танланган Вазирлар Маҳкамаси аъзоларини таклиф қилганликда айбдор деб топилди. У шунингдек, ҳарбий ҳолат тўғрисидаги фармон бекор қилингандан сўнг, сохта эълон ҳужжатини тузган ва уни кейинчалик йўқ қилганликда айбланган. Суд Ёлни ёлғон пресс-релизлар тарқатиш айбловидан оқлади.
Якуний суд мажлисида далилларни кўриб чиқиш якунланади, ҳукм чиқариш бўйича тавсиянома ва махсус прокурор гуруҳининг позициясини, шунингдек, ҳимоячининг якуний сўзлари ва Юн Сок Ёлнинг якуний сўзлари тингланади. Июнь ойи охиригача ҳукм чиқарилиши кутилмоқда.
Г.Сатторова, ЎзА
