Ajiniyoz nomidagi Nukus davlat pedagogika institutiga 1500 dan ortiq yangi badiiy-adabiy kitob topshirildi.

Shu munosabat bilan tashkil etilgan tadbirda ta’kidlanganidek, Prezidentimizning besh muhim tashabbusi doirasida xalqimiz orasida kitobxonlik madaniyatini oshirish, yoshlarni ommaviy ravishda kitobxonlikka jalb qilish davlat siyosati darajasiga ko‘tarilgan.

O‘zbekiston xalq yozuvchisi, Qoraqalpog‘iston Yozuvchilar uyushmasi raisi K.Karimov tadbirda ishtirok etayotgan Zulfiya nomidagi Davlat mukofotining bu yilgi sovrindori bo‘lgan institut talabasi Yerkinay Orinbayeva hamda uning ustozi, dotsent Sofiya Tajetdinovani qutlab, bayram sovg‘asini topshirdi. Shuningdek, bugungi kunda Yozuvchilar uyushmasi tomonidan adiblarning kitoblarini nashrga tayyorlash, chop etishga yordam berish yo‘nalishida amalga oshirilayotgan ishlar haqida ma’lumot berdi.

Tadbirda O‘zbekiston Qahramonlari Ibroyim Yusupov hamda To‘lepbergen Qayipbergenovning, shu bilan birga, K.Karimovning o‘z qalamiga mansub asarlari jamlangan yangi kitoblar institutning axborot-resurs markaziga sovg‘a qilindi.

Ma’lumot o‘rnida, mazkur kitoblar bugungi kun yoshlari tomonidan mutolaa qilinishi zarur bo‘lgan, mutaxassislar tomonidan tavsiya qilingan eng yaxshi asarlardan iborat bo‘lib, ularni xarid qilish uchun institutning o‘z mablag‘i hisobidan 40 million so‘m ajratildi.

 

Dovud Abibullayev, O‘zA