Хизмат автомобиллари топширилди
Эътибор ва ғамхўрлик бор жойда ҳуқуқ ҳимояси ҳам мустаҳкам бўлади. Айниқса, истеъмолчи сифатида ҳар бир инсоннинг ҳуқуқ ва манфаатларини ишончли ҳимоя қилиш, мурожаатларни жойига чиққан ҳолда ўрганиш ва муаммоларга тезкор ечим топиш бугунги куннинг муҳим вазифаларидан биридир.
Ўзбекистон Республикаси Давлат мустақиллигининг 35 йиллиги муносабати билан Истеъмолчилар ҳуқуқларини ҳимоя қилиш жамиятлари федерацияси Бухоро вилояти ҳудудий бирлашмасининг 4 та туман ва шаҳар жамиятига хизмат автомобиллари топширилди. Мазкур амалий қадам истеъмолчилар ҳуқуқларини ҳимоя қилиш тизимини ҳудудларда янада кучайтириш, аҳоли мурожаатларини ўрганиш ва уларнинг қонуний манфаатларини ҳимоя қилиш самарадорлигини оширишга хизмат қилади.
Ўзбекистон Республикаси Президентининг истеъмолчилар ҳуқуқларини ҳимоя қилиш тизимини такомиллаштиришга қаратилган қарорлари ижроси доирасида айни пайтда мазкур соҳада кенг кўламли ишлар амалга оширилмоқда.
Давлат раҳбари ташаббуси билан аҳолининг ҳуқуқий ҳимоясини кучайтириш, фуқаролар мурожаатларига бефарқ бўлмаслик, уларнинг муаммоларини жойида ўрганиш ва манзилли ечим топишга алоҳида эътибор қаратилмоқда.
Шу маънода, хизмат автомобилларининг топширилиши оддий бир техник воситанинг янгиланиши эмас. Бу — аҳолига яқинлашиш, мурожаатлар ортидан бориш, муаммони хонадан эмас, ҳаётнинг ўзида ўрганиш учун яратилган қўшимча имкониятдир.
Энди Федерациянинг Бухоро ва Когон шаҳарлари, Бухоро ҳамда Қоракўл туманлари жамиятлари ходимлари ўз ҳудудларида истеъмолчилар мурожаатларини ўрганиш, ҳуқуқий тушунтириш ишларини олиб бориш ва муаммоли ҳолатларни жойига чиққан ҳолда таҳлил қилиш имкониятига эга бўлади.
Тадбирнинг яна бир муҳим жиҳати — давлат органлари ва нодавлат нотижорат ташкилотлари ўртасидаги ижтимоий шерикликни янада мустаҳкамлашдир. Зеро, фуқаролик жамиятининг куч-қудрати, аввало, одамларнинг ўз ҳуқуқ ва манфаатларини англаши, уларни ҳимоя қилишда фаол иштирок этиши билан белгиланади. Истеъмолчилар ҳуқуқларини ҳимоя қилиш жамиятлари эса бу жараёнда аҳоли билан давлат ўртасидаги муҳим кўприк вазифасини бажаради. Фуқаролардан келиб тушаётган мурожаатлар, кундалик ҳаётда учраётган муаммолар, хизматлар сифати ва истеъмолчилар ҳуқуқларига оид масалаларни ўрганиш орқали жамоатчилик назоратининг самарадорлиги ошади. Бу эса, ўз навбатида, қонунийликни мустаҳкамлаш, инсон қадрини улуғлаш ва жамиятда ҳуқуқий маданиятни юксалтиришга хизмат қилади.
Бугун истеъмолчи ўз ҳақ-ҳуқуқини билса, жамиятда адолат ва масъулият муҳити ҳам мустаҳкамланади. Бир қарашда оддийдек туюлган хизмат автомобили эса ана шу эзгу мақсадларга эришишда муҳим воситага айланиши мумкин. Чунки унинг ҳар бир ҳаракати ортида бир мурожаат, бир муаммо, бир оиланинг манфаати ва энг муҳими — инсон тақдири турибди. Шу боис ушбу хизмат автомобилларининг топширилиши Бухоро вилоятида истеъмолчилар ҳуқуқларини ҳимоя қилиш тизимини янада такомиллаштириш йўлидаги муҳим амалий қадамдир.
Мустақилликнинг 35 йиллиги арафасидаги бу хайрли ташаббуснинг моҳияти ҳам шунда: инсон қадри улуғланган юртда ҳар бир фуқаронинг ҳуқуқи ҳимояда, ҳар бир мурожаат эътиборда ва ҳар бир муаммонинг ечимига йўл очиқ бўлади.
Зариф Комилов, ЎзА мухбири
