АҚШ Президенти Дональд Трамп айтишича, Ҳиндистон Бош вазири Нарендра Моди унга Россиядан нефть сотиб олишни тўхтатишга ваъда берган. Америка етакчиси бу келишув жуда тез орада амалга ошишини ҳам қўшимча қилган.

– Мен Ҳиндистон рус нефтини харид қилаётганидан норози эдим, бугун Моди жаноблари менга Россиядан нефть сотиб олмаслигини кафолатлади, – деди у Оқ уйда журналистларга.

Трамп бу ваъдани “катта қадам” деб атаб, энди шунга ўхшаш қарорни Хитойдан ҳам кутаётганини билдирган.
“Reuters” маълумотига кўра, Россия кетма-кет уч йил Ҳиндистоннинг энг йирик нефть таъминотчиси мавқеини ҳеч бир давлатга бермади. Украина билан уруш бошланиб, РФ нефти арзонлашгач, ҳинд нефтни қайта ишлаш заводлари учун бу йўл янада жозибадор кўринди.

Трамп эса Россиянинг савдо ҳамкорларига нисбатан 100 фоизлик иккиламчи бож жорий қилиш билан таҳдид қилди. Шундан кейин Ҳиндистондаги тўртта давлат нефтни қайта ишлаш заводи Россиядан хом ашё олишни тўхтатди.

Айни пайт қарийб бир ҳафта давомида Ҳиндистондаги компаниялар рус нефтига қизиқиш билдирмагани ҳақида хабарлар бор.
Кейинроқ ҳинд оммавий ахборот воситалари ҳукуматдаги манбаларига таяниб, бир неча давлат корхонаси РФ нефтини сотиб олаётгани хусусида ёзди. Шундан кейин Трамп рус нефти харидини қисқартиришга рози бўлмагунча, Ҳиндистон билан савдо келишувини маъқуллашдан бош тортганини айтди.

Ҳиндистон шу воқеалардан хулоса чиқарган шекилли, бугун Трамп “қора олтин” билан боғлиқ юқоридаги янгиликни улашди. Ҳали Россия томони мавзуга муносабат билдиргани йўқ.

<iframe width="650" height="420" src="https://www.youtube.com/embed/_eGWO2CytNA" title="Hindiston Rossiyadan neft xarid qilmaydigan bo‘ldi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА