Халқаро кўргазмада ҳунармандларимиз 20 минг долларга яқин маҳсулотлар савдосини амалга оширди
Индонезия Республикасининг пойтахти Жакарта шаҳрида “Inacraft” халқаро ҳунармандчилик маҳсулотлари ярмаркаси бўлиб ўтди. Унда юртимиз ҳунармандлари ҳам ўзлари яратган ўзбек миллий ҳунармандчилик маҳсулотлари билан фаол иштирок этди.
Республика “Ҳунарманд” уюшмаси маълумотига кўра, ушбу кўргазма-ярмаркада дунёнинг 25 давлатидан 1 минг 300 нафар иштирокчи қатнашди. Беш кун давом этган кўргазмада ўзбек ҳунармандлари 20 минг долларга яқин маҳсулотлар савдосини амалга оширди.
“Inacraft” кўргазмаси асосан Индонезия ҳунармандчилигини халқаро бозорларга олиб чиқишга мўлжалланган бўлиб, 2025 йилдан бошлаб ушбу ярмаркада ўзбекистонлик ҳунармандлар қатнашишларини таъминлаш бўйича келишувга эришилган. Кўргазма Бутунжаҳон ҳунармандлар кенгашининг Осиё ва Тинч Океани минтақаси ҳамкорлигида ўтказилди.
Айтиб ўтиш керакки, Ўзбекистон павильони Бутунжаҳон ҳунармандлар кенгашининг Осиё ва Тинч Океани минтақаси павильонидан ўрин олган. Эътиборли жиҳати шундаки, кўргазмада иштирок этан ўзбекистонлик 7 нафар иштирокчи учун ҳар бири 1080 доллар турадиган стендлар бепул тақдим этилди.
Гулноза Бобоева, ЎзА
