Ғарбий соҳилдаги қирғин ортидан вазият яна кескинлашди
Исроил Бош вазири Биньямин Нетаньяху Ғарбий соҳилда содир бўлган қонли тўқнашувдан кейин армияга кескин чоралар кўриш бўйича кўрсатма берган. Ҳодиса Телл қишлоғи яқинида юз берган. Фаластин Соғлиқни сақлаш идораси маълумотига кўра, тўрт нафар фаластинлик ҳалок бўлган, тўрт киши жароҳат олган. Исроилнинг “Маген Давид Адом” тез ёрдам хизмати бир исроиллик ҳам вафот этганини маълум қилди.
Томонлар воқеага турлича изоҳ бермоқда. WAFA ахборот агентлиги хабар беришича, исроиллик кўчманчилар қишлоқнинг шарқий қисмига кириб, дўкон, икки хонадон ҳамда қишлоқ хўжалиги экинларига ўт қўйган. Исроил Мудофаа кучлари (IDF) эса шу ҳудудда сайр қилиб юрган фуқароларга ҳужум қилингани, воқеа жойига етиб келган хавфсизлик ходимининг қуроли тортиб олингач, отишма бошланганини билдирди. Армия қуролни олиб қочгани гумон қилинган шахс йўқ қилинганини айтди.
Шундан сўнг Нетаньяху армияга террорга қарши қатъий ҳаракат қилиш, ҳужумда гумон қилинган шахснинг уйини бузиш, хавф юқори дея баҳоланаётган қишлоқларда амалиётни кучайтириш ҳамда Ғарбий соҳил бўйлаб қўшимча кучлар жойлаштириш вазифасини юклади. Шу билан бирга мавжуд яҳудий қишлоқларини расмийлаштириш ва янгиларини ташкил этиш жараёни тезлаштирилишини ҳам эълон қилди.
Ғарбий соҳил 1967 йилдан буён Исроил назоратида. 2023 йил 7 октябрда бошланган уруш ортидан Ғазода зўравонлик янада кучайган. БМТ Инсон ҳуқуқи бўйича Олий комиссари бошқармаси маълумотига кўра, 2024 йил октябрь ҳолатида Ғарбий соҳил ва Шарқий Қуддусда 737 000 га яқин исроиллик кўчманчи яшаган. Халқаро ҳуқуқ бундай аҳоли манзилларини ноқонуний ҳисоблайди. Европа Иттифоқи май ойида Ғарбий соҳилдаги зўравонлик ортидан кўплаб исроиллик кўчманчиларга нисбатан янги санкция жорий этган.
Мусулмон Зиё, ЎзА
