O‘zbekiston Respublikasi Vazirlar Mahkamasi “Ichki ishlar organlarining patrul-post xizmati bo‘linmalari tomonidan fuqarolar gavjum bo‘ladigan joylarda jamoat tartibini saqlash va jamoat xavfsizligini ta’minlash bo‘yicha davlat xizmatlarini shartnomaviy-huquqiy asosda ko‘rsatishning ma’muriy reglamentini tasdiqlash to‘g‘risida” qaror qabul qildi.

Unga muvofiq, 2025 yil 1 sentyabrdan boshlab:

fuqarolar gavjum bo‘ladigan joylarda jamoat tartibini saqlash va jamoat xavfsizligini ta’minlash borasidagi davlat xizmatlarini shartnomaviy-huquqiy asosda ko‘rsatish bo‘yicha ichki ishlar organlarining patrul-post xizmati bo‘linmalariga O‘zbekiston Respublikasi Yagona interaktiv davlat xizmatlari portali hamda Davlat xizmatlari markazlari orqali murojaat qilish;

ichki ishlar organlari patrul-post xizmati bo‘linmalari tomonidan fuqarolar gavjum bo‘ladigan joylarda jamoat tartibini saqlash va jamoat xavfsizligini taminlash borasidagi davlat xizmatlarini Ichki ishlar vazirligining “Ye-patrul” tizimi orqali ko‘rsatish imkoniyati yaratiladi;

yuridik shaxslar fuqarolar gavjum bo‘ladigan joylarda jamoat tartibini saqlash va jamoat xavfsizligini ta’minlash borasidagi davlat xizmatlarini shartnomaviy-huquqiy asosda ko‘rsatish bo‘yicha ichki ishlar organlarining patrul-post xizmati bo‘linmalariga an’anaviy (og‘zaki yoki yozma) tarzda murojaat qilishlari mumkin bo‘ladi.

Mazkur qaror bilan Ichki ishlar organlarining patrul-post xizmati bo‘linmalari tomonidan fuqarolar gavjum bo‘ladigan joylarda jamoat tartibini saqlash va jamoat xavfsizligini ta’minlash bo‘yicha davlat xizmatlarini shartnomaviy-huquqiy asosda ko‘rsatishning ma’muriy reglamenti tasdiqlandi.

Reglamentda:

yuridik shaxslar tomonidan fuqarolar gavjum bo‘ladigan joylarda jamoat tartibini saqlash va jamoat xavfsizligini ta’minlash borasidagi xizmatlarni ko‘rsatish bo‘yicha ichki ishlar organlarining patrul-post xizmati bo‘linmalariga murojaat qilish tartibi;

murojaatlarni ko‘rib chiqish tartibi va ularni rad etish asoslari;

fuqarolar gavjum bo‘ladigan joylarda jamoat tartibini saqlash va jamoat xavfsizligini ta’minlash faoliyatini tashkil etish tartibi belgilab berilgan.

O‘zA