Fransiyada fermerlarning norozilik namoyishi avj oldi. Sut ishlab chiqaruvchilar Milliy Assambleya va Eyfel minorasi orasini to‘ldirishdi.

“AzerTAJ” xabariga ko‘ra, sut ishlab chiqaruvchilar ish haqi oshirilishini talab qilmoqda. Ular o‘ta og‘ir ish sharoitiga qaramay, maosh juda pastligini iddao qilishgan. Bu harakat Mustaqil sut ishlab chiqaruvchilar ittifoqi tomonidan qo‘llab-quvvatlangan.

Hukumat fermerlarni tinchlantirish uchun kichik choralar ko‘rgan bo‘lsa-da, o‘ta jiddiy, tarkibiy xususiyatga ega ekani ta’kidlangan muammo to‘liq hal etilmagan.

Sutchi fermer xo‘jaliklar maoshini oshirish to‘g‘risidagi qonun faqat sut mahsulotlari ishlab chiqaruvchilarning 50 foizi, ya’ni faqat oziq-ovqat xizmati va eksport tarmog‘iga taalluqliligi ta’kidlangan. Hozir 1 litr sut narxi ishlab chiqarish tannarxidan sezilarli darajada pastligi tufayli fermerlar zarar ko‘rmoqda.

Prezident Emmanuel Makron fermerlar noroziligi boshlangandan beri ilk bor uyushma vakillari bilan uchrashishi kutilyapti.