Эрон АҚШга 14 банддан иборат тинчлик режасини топширди (+видео)
Эрон ҳукумати Вашингтонга Эрон–Исроил ва кенг минтақадаги можарони якунлаш бўйича ўзининг 14 бандлик тинчлик режасини тақдим этди. Теҳрон ҳозир АҚШ томонидан расмий жавобни кутмоқда, деб хабар берди DW нашри.
Эроннинг Fars ва Tasnim агентликлари маълумотига кўра, бу ҳужжат АҚШнинг олдин таклиф қилган 9 бандлик режасига жавоб сифатида тайёрланган. АҚШ таклифида икки ойлик ўт очишни тўхтатиш назарда тутилган бўлса, Эрон барча масалаларни бир ой ичида ҳал қилишни ва асосий эътиборни урушни тугатишга қаратишни таклиф қилган.
Эрон режасида АҚШдан ҳужум қилмаслик кафолати, чегара ҳудудларидан америка қўшинларини тўлиқ олиб чиқиш, ҳарбий денгиз блокадаларини бекор қилиш, музлатилган Эрон активларини қайтариш каби талаблар илгари сурилган.
Шунингдек, Теҳрон етказилган зарар учун компенсация тўлаш, санкцияларни бекор қилиш, минтақадаги ҳарбий ҳаракатларни тўхтатиш ҳамда Ҳурмуз бўғозининг янги ишлаш механизмини жорий этишни талаб қилмоқда.
АҚШ президенти Дональд Трамп Эроннинг таклифини ҳозирча кўриб чиқишини айтган, аммо маъқул бўлмаслиги мумкинлигини ҳам таъкидлаган. Унинг сўзларига кўра, Эрон “сўнгги 47 йил давомидаги ҳаракатлари учун етарли ҳақ тўламаган”.
Трамп маъмуриятига кўра, Эрон билан можаро расман якунланган деб ҳисобланса-да, минтақадаги вазият ҳали ҳам кескинлигича қолмоқда.
Маълумотларга кўра, стратегик аҳамиятга эга Ҳурмуз бўғози Эрон томонидан назорат қилинмоқда, АҚШ эса Эрон портларига нисбатан денгиз блокадасини давом эттирмоқда.
Эрон ва АҚШ ўртасидаги можаро ҳали тўлиқ тугамаган бўлиб, томонлар тинчлик шартлари бўйича кескин қарама-қарши позицияда қолмоқда.
<iframe width="650" height="420" src="https://www.youtube.com/embed/whkaeosrGVU" title="Eron AQShga 14 banddan iborat tinchlik rejasini topshirdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Искандар Исматов, ЎзА
