O‘zbekiston Respublikasi Prezidenti “Elektrotexnika sanoatini rivojlantirishni yangi bosqichga olib chiqishga doir qo‘shimcha chora-tadbirlar to‘g‘risida” qaror qabul qildi.

Elektrotexnika sanoati sohada yaratilgan sharoitlar natijasida so‘nggi yetti yilda respublikaning yirik mahalliy sanoat tarmog‘iga aylandi, tarmoqda ishlab chiqarish hajmi qariyb 2 barobarga, eksport hajmi 7 barobarga o‘sdi va geografiyasi 63 ta davlatga yetdi. 

Elektrotexnika sanoati va unga yondosh sohalarni rivojlantirish, yuqori texnologiyali hamda yuqori qo‘shilgan qiymatli mahsulotlar ishlab chiqarishni rag‘batlantirish, ilmiy-tadqiqot va tajriba-konstruktorlik ishlarini sohaga keng joriy etish maqsadida Elektrotexnika sanoatini 2025-2027 yillarda rivojlantirish va yangi bosqichga olib chiqishning asosiy yo‘nalishlari etib quyidagilar belgilandi: 

tarmoqda qo‘shilgan qiymat ulushini o‘rtacha 21 foizdan 30 foizga va ishlab chiqarish hajmini 58 trillion so‘mga yetkazish; 

qayta ishlash jarayonlariga ilg‘or texnologiyalarni joriy etish, yuqori qo‘shilgan qiymatli tayyor mahsulotlar ishlab chiqarishni kengaytirish va diversifikatsiya qilish hisobiga eksport hajmini 3,0 milliard AQSH dollariga yetkazish; 

yuqori texnologiyalarga asoslangan elektrotexnika mahsulotlari ishlab chiqarishni rag‘batlantirish hamda innovatsion g‘oyalarni joriy etishni qo‘shimcha rag‘batlantirish orqali umumiy qiymati 4,0 milliard AQSH dollari miqdoridagi investitsiya loyihalarini amalga oshirish; 

ishlab chiqarishni avtomatlashtirish, raqamli boshqaruv tizimini joriy etish orqali mahsulotlar raqobatbardoshligini oshirish.

Qaror bilan: 

Elektrotexnika sanoatini rivojlantirishning 2025-2027 yillarga mo‘ljallangan maqsadli ko‘rsatkichlari; 

Elektrotexnika sanoatida yangi ishlab chiqarish quvvatlarini yaratish va ishlab chiqarishni diversifikatsiya qilish dasturi doirasida 2025-2027 yillarda amalga oshiriladigan investitsiya loyihalarini ishga tushirishning yig‘ma parametrlari; 

Elektrotexnika mahsulotlarini mahalliy ishlab chiqaruvchilar va ularning rasmiy dillerlari hamda distribyutorlaridan xarid qilishning 2025-2027 yillarga mo‘ljallangan maqsadli ko‘rsatkichlari; 

Elektrotexnika sanoati va unga yondosh sohalarni rivojlantirish, yuqori texnologiyali hamda yuqori qo‘shilgan qiymatli mahsulotlar ishlab chiqarishni rag‘batlantirish bo‘yicha "yo‘l xaritasi" tasdiqlandi.

O‘zA