Экологияга 881 миллион сўмлик зиён (+видео)
Шаҳар муҳитида ҳар бир дарахт нафақат ҳавони тозалайди, балки инсон саломатлиги ва ҳаёт сифатига ҳам бевосита таъсир кўрсатади. Сўнгги вақтларда дарахтларни ноқонуний кўчириш ҳолатлари ортиб бораётгани жамоатчиликни жиддий ўйга толдирмоқда.
Яқинда Экология ва иқлим ўзгариши миллий қўмитаси ҳузуридаги Давлат экологик назорат инспекцияси — Экополицияга келиб тушган мурожаат асосида Тошкент шаҳрининг Шайхонтоҳур тумани, “Юнона” МФЙ, Абу Али ибн Сино кўчасида ўрганиш ишлари олиб борилган.
Текширув давомида ёпиқ коллектор ҳудудида фирмалардан бири томонидан 108 туп дарахт ноқонуний равишда кўчириб ўтқазилгани маълум бўлган.
Мутахассислар дарахтларнинг ҳолатини ўрганиш вақтида, 107 туп дарахт қуриб қолганига гувоҳ бўлишган. Улар орасида 12 туп можжевелник (арча) ва 95 туп Элдор қарағайи мавжуд бўлган.
Ваҳоланки, аввалроқ, мазкур дарахтлар бўйича Тошкент шаҳар экология бош бошқармасига мурожаат қилинган ва расмий равишда рад жавоби берилган. Шунга қарамасдан, дарахтларни кўчириш ишлари амалга оширилган. Мутахассисларга кўра, бу қонун талабларини очиқдан-очиқ менсимаслик ҳолати ҳисобланади ва мазкур ҳуқуқбузарлик ортидан табиатга 881 миллион 268 минг сўм зарар етказилган.
Шу тариқа бир нечта қарор ва қоидаларга амал қилмаслик натижасида юзлаб дарахтлар нобуд бўлган. Бу эса нафақат бугунги кун, балки келажак авлод учун ҳам йўқотиш демакдир.
Экология вазирлиги Ахборот хизматининг маълум қилишича, ҳозирда ушбу ҳолат юзасидан тўпланган барча ҳужжатлар ҳуқуқни муҳофаза қилувчи органларга тақдим этиш учун тайёрланмоқда.
<iframe width="640" height="420" src="https://www.youtube.com/embed/O-XUO0sLHgo" title="Ekologiyaga 881 million so‘mlik ziyon" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>М.Эшмирзаева, ЎзА
