Dunyo xabarlari qisqa satrlarda
Qisqa, aniq va ishonchli axborot – global dunyoda tezkor xabardorlik garovi. O‘zA jahonda sodir bo‘layotgan eng muhim voqealarni qisqa satrlarda taqdim etadi.
Tramp: Eron bilan tez orada kelishuv bo‘lishi mumkin
AQSH prezidenti Donald Tramp Eron bilan mojaroni yakunlash bo‘yicha kelishuv “yaqin orada” imzolanishi mumkinligini bildirdi. U hatto “rejim almashgani”ni da’vo qildi, biroq rasmiy Tehron Vashingtonni muzokaralar ortida quruqlikdan hujum tayyorlashda ayblab, keskin bayonotlar bermoqda.
Shu bilan birga, hujumlar davom etmoqda: Eron kecha Kuvayt va Saudiya Arabistoniga zarbalar berdi, Tehronda esa elektr uzilishlari kuzatilmoqda. Hududga AQSH harbiy kuchlari ham jo‘natilmoqda, bu esa vaziyat bir vaqtning o‘zida ham muzokara, ham eskalatsiya bosqichida ekanini ko‘rsatmoqda.
Finlyandiyada noma’lum dronlar…
Finlyandiyaning janubi-sharqida joylashgan Kuovola shahri yaqinida ikkita noma’lum dron urib tushirildi va bu holat “hududiy buzilish” sifatida baholanmoqda. Mamlakat Mudofaa vazirligiga ko‘ra, dronlar past balandlikda harakatlangan va harbiylar ularni aniqlash uchun maxsus qiruvchi uchoqlarni havoga ko‘targan.
O‘lka bosh vaziri Petteri Orpo bu dronlar Ukrainaga tegishli bo‘lishi mumkinligini, ammo Rossiya tomonidan signallar buzilgani sabab yo‘nalishdan adashgan bo‘lishi ehtimolini aytdi. Rasmiylar holatni jiddiy qabul qilayotganini va barcha tafsilotlar aniqlangandan so‘ng qo‘shimcha ma’lumot berilishini ma’lum qildi.
Isroil G‘arbiysohilda ko‘chmanchilar zo‘ravonligiga qarshi chora ko‘radi
Isroil bosh vaziri Binyamin Netanyaxu idorasi G‘arbiy sohildagi yahudiy ko‘chmanchilar zo‘ravonligiga qarshi keskin choralar ko‘rish bo‘yicha maxsus ko‘rsatma berdi. Hujjatga ko‘ra, armiya Livandagi operatsiyadan ayrim kuchlarni olib, vaziyatni nazorat qilish uchun G‘arbiy sohilga yo‘naltiradi. Shuningdek, yangi noqonuniy shaharchalar qurilishiga cheklovlar qo‘yilishi va qoidabuzarlarga iqtisodiy sanksiyalar joriy etilishi rejalashtirilgan.
Bu qaror Netanyaxu hukumati uchun noodatiy qadam sifatida baholanmoqda, chunki avval ko‘chmanchilar zo‘ravonligi ko‘pincha alohida holat sifatida talqin qilinar edi. Rasmiylar “Hilltop Youth” kabi radikal guruhlarga qarshi ham alohida choralar ko‘rishmoqda. Xalqaro tashkilotlar ma’lumotiga ko‘ra, 2025-yilda G‘arbiy sohilda zo‘ravonlik holatlari keskin oshgan va bu muammo hali ham jiddiy xavf sifatida saqlanib qolmoqda.
AQSHda “No Kings” namoyishlari…
Qo‘shma Shtatlar va dunyo bo‘ylab “No Kings” shiori ostida o‘tgan ommaviy namoyishlarda millionlab odamlar prezident Donald Tramp siyosatiga qarshi ko‘chaga chiqdi. Tashkilotchilarga ko‘ra, 50 shtat bo‘ylab 3 300 dan ortiq aksiyalarda kamida 8 million kishi ishtirok etgan. Namoyishchilar Trampning avtoritar uslubi, migratsiya siyosati, iqlim o‘zgarishiga munosabati va Eron bilan bog‘liq urush siyosatiga e’tiroz bildirgan.
Aksiyalar asosan tinch o‘tgan bo‘lsa-da, ayrim shaharlarda hibsga olish holatlari kuzatildi. Yevropa shaharlarida ham qo‘llab-quvvatlov namoyishlari o‘tkazildi, bu esa AQSHdagi siyosiy bo‘linish xalqaro maydonda ham aks etayotganini ko‘rsatmoqda. Oq uy esa bu namoyishlarni tanqid qilib, ularni siyosiy raqiblar tomonidan qo‘llab-quvvatlanayotgan harakat deb baholadi.
Krit yaqinida 22 migrant halok bo‘ldi
Gretsiyaning Krit oroli yaqinida Yevropa tomon yo‘l olgan migrantlar qayig‘ida 22 kishi halok bo‘ldi, 26 nafar esa qutqarildi. Qayiq Liviyaning Tobruk shahridan yo‘lga chiqqan bo‘lib, olti kun davomida oziq-ovqat va suvsiz qolgan. Omon qolganlar orasida ayol va voyaga yetmagan shaxs ham bor, jabrlanganlar shifoxonalarga joylashtirildi.
Tirik qolganlar ma’lumotiga ko‘ra, safar davomida halok bo‘lganlarning jasadlari kontrabandachilar buyrug‘i bilan dengizga tashlangan. Gretsiya hukumati ikki nafar gumonlanuvchini qo‘lga oldi va ularga nisbatan jinoiy ish qo‘zg‘atildi. Mutaxassislar ta’kidlashicha, bu kabi fojialar soni joriy yilda keskin oshgan bo‘lib, migratsiya yo‘nalishlarida xavf tobora kuchaymoqda.
Qatar va Ukraina mudofaa kelishuvini imzoladi
Prezident Vladimir Zelenskiyning Dohadagi tashrifi doirasida Qatar va Ukraina mudofaa sohasida hamkorlik kelishuvini imzoladi. Bu kelishuv Zelenskiyning Fors ko‘rfazi davlatlari bo‘ylab safari doirasida amalga oshirilib, asosiy e’tibor Eron dronlariga qarshi kurash va xavfsizlik hamkorligiga qaratilgan. Ukraina bu yo‘nalishda o‘z tajribasini taklif qilib, mintaqada yangi strategik sherikliklarni shakllantirmoqda.
Zelenskiy Saudiya Arabistoni va BAA bilan ham shunday kelishuvlarga erishganini ma’lum qildi. Ukraina mutaxassislari allaqachon mintaqada faoliyat yuritmoqda va dronlarga qarshi samarali tizimlar joriy etilmoqda. Bu hamkorlik Kiyev uchun havo hujumlaridan himoyani kuchaytirish imkonini bersa, Ko‘rfaz davlatlari uchun zamonaviy mudofaa texnologiyalarini olish imkoniyatini yaratmoqda.
Musulmon Ziyo, O‘zA
