Депутат кўмагида мактабнинг янги биноси қурилди

Энг улуғ, энг азиз байрамимиз муносабати билан юртимизнинг турли бурчакларида қатор ижтимоий объектлар, янги бино ва иншоотлар фойдаланишга топширилди. Жумладан, Оққўрғон туманининг “Халқобод” маҳалласида ҳам 24-сонли умумтаълим мактабининг замонавий, янги биноси фойдаланишга топширилгани маҳалла аҳли, устозлар ва ўқувчиларга катта қувонч бағишлади.

Янги мактаб биносининг тантанали очилиш маросимида Олий Мажлис Қонунчилик палатаси депутатлари, маҳалла аҳолиси, ўқитувчи ва ўқувчилар иштирок этди.

24-умумтаълим мактаби учун янги ўқув биносининг барпо этилишида халқ вакилларининг кўмаги алоҳида аҳамият касб этди.

— Мактаб учун янги бино қуриш масаласи Олий Мажлис Қонунчилик палатаси депутати Виктор Пакнинг аҳоли билан очиқ мулоқоти давомида кўтарилган эди, — дейди меҳнат фахрийси М.Самадов. — Маҳалламиз аҳолиси фарзандларимиз муносиб таълим олишлари учун халқ вакилидан амалий кўмак сўраган эди. Мурожаатимиз эътиборсиз қолмади. Орадан кўп ўтмай, умумий қиймати 4 миллиард сўмни ташкил этган қурилиш ишлари бошланиб, Жанубий Кореянинг “Good Neighbours International” халқаро ёрдам фонди кўмагида замонавий мактаб биноси барпо этилди.

Дарҳақиқат, халқ вакилларининг жойларда аҳоли билан ўтказаётган очиқ мулоқотлари, бу жараёнларда билдирилган таклиф ва мурожаатлар эътиборсиз қолмаётгани таҳсинга лойиқ. Депутатнинг ҳудудлардаги ўрганишлари, мулоқотлари аниқ натижа билан якунланаётгани эса аҳоли вакилларида давлат ва халқ вакилларига бўлган ишончни янада мустаҳкамламоқда.

М.Комилова, ЎзА