Демократлар АҚШ Конгрессида кўпчиликни ташкил қилди
АҚШда Конгрессга ўтказилган оралиқ сайловнинг дастлабки натижасига кўра, Демократик партия Вакиллар палатаси ва Сенатда кўпчилик ўринни қўлга киритяпти. Бу ҳақда BBC хабар берган.
Дастлабки ҳисоб-китобга кўра, демократлар Вакиллар палатасида камида 245, республикачилар эса 166 ўринни қўлга киритиши мумкин. Сенатда эса демократлар 100 ўриндан камида 53 тасини эгаллаши кутиляпти.
Демократлар анъанавий равишда республикачилар кучли бўлган қатор штатларда ҳам ғалаба қозонди. Жумладан, Техас, Мэн, Жанубий Каролина ва Огайода демократ номзодлар устун келди.
Бу натижа Президент Дональд Трамп учун Конгрессдаги қўллаб-қувватлов камайишини англатади. Демократлар кўпчиликни қўлга киритгач, Трамп маъмуриятининг қонун лойиҳаларини қабул қилишга тўсқинлик қилиши, унинг фаолияти бўйича текширув ўтказиши ва айрим лавозимларга тайинловларни рад этиши мумкин.
Трамп сайлов натижасини қабул қилишга тайёрлигини билдириб, демократлар билан ҳамкорлик қилишини айтди. Зарур ҳолларда президентлик ветоси ҳуқуқидан фойдаланишини ҳам ишора қилди.
Янги сайланган конгрессменлар ва сенаторлар 2027 йил январь ойида лавозимларига киришади.
Мутахассислар таъкидлашича, демократлар Конгрессда кўпчиликни эгаллаган тақдирда ҳам Трампни лавозимидан четлатиш осон эмас. Бунинг учун Сенатда камида 67 нафар сенаторнинг овози талаб этилади.
Кенжа Бекжонов, Улуғбек Тўхтаев (видео), ЎзА
