O‘zbekiston Respublikasi Prezidenti “Davlat ishtirokidagi yirik korxonalarni xalqaro bozorlarda xususiylashtirish to‘g‘risida” qaror qabul qildi.

Unga muvofiq, davlat ishtirokidagi yirik korxonalarni xalqaro va mahalliy bozorlarda sotishning asosiy maqsadli ko‘rsatkichlari belgilandi. Ular: 

a) 29 ta davlat ishtirokidagi yirik korxona ustav kapitalidagi aksiyalar paketini (ulushlarni) nufuzli xalqaro professional konsultantlarni jalb qilgan holda ommaviy savdolarga chiqarish; 

b) 12 ta davlat ishtirokidagi yirik korxona ustav kapitalidagi aksiyalar paketining xalqaro va mahalliy fond bozorlarida birlamchi (IPO) va (yoki) ikkilamchi (SPO) ommaviy taklifini o‘tkazishdan iborat. 

Qarorga muvofiq: 

a) Professional konsultantlarni jalb qilgan holda xalqaro va mahalliy bozorlarda ommaviy savdolarga chiqariladigan aksiyalar paketlari (ulushlar) ro‘yxati; 

b) Xalqaro va mahalliy fond bozorlarida aksiyalarining birlamchi (IPO) va (yoki) ikkilamchi (SPO) ommaviy taklifi o‘tkaziladigan davlat ishtirokidagi yirik korxonalar ro‘yxati; 

v) Davlat ishtirokidagi ayrim yirik korxonalarni sotish mexanizmi; 

g) Davlat ishtirokidagi yirik korxonalar ustav kapitalidagi aksiya paketlarini (ulushlarni) xususiylashtirish oldi tayyorgarlik ishlarini muvofiqlashtirish bo‘yicha ishchi guruhi tarkibi va uning asosiy vazifalari  tasdiqlandi. 

2025 yil 1 iyulga qadar Energetika vazirligining yoqilg‘i yetkazib berishning eng kam miqdori bo‘yicha kafolati asosida xalqaro bozorda issiqlik elektr stansiyalarining ochiq ommaviy savdolari e’lon qilinadi.  

Tasdiqlangan chora-tadbirlar ijrosi yakuni bo‘yicha "O‘zmetkombinat" AJning ustav kapitalidagi davlat ulushi savdoga chiqariladi.

2025 yil 1 dekabrga qadar 2030 yilgacha davlat korxonalarini isloh qilish va xususiylashtirish strategiyasi ishlab chiqiladi va Vazirlar Mahkamasiga kiritiladi.

O‘zA