O‘monning ommabop “Asdaa Oman” gazetasida “Markaziy Osiyo: jadal rivojlanayotgan mintaqa va yangi ufqlar” sarlavhali maqola chop etildi.

Nashrda mintaqa davlatlarining infratuzilma, sanoat, energetika va texnologiyalar bo‘yicha manfaatlari uyg‘unligi, Kaspiydan Tyan-Shan tog‘larigacha bo‘lgan yo‘laklar esa bo‘lajak Yevroosiyo sanoat xaritasining asosiga aylanayotgani qayd etilgan.

Ta’kidlanishicha, mintaqaning yetakchi mamlakatlaridan biri – O‘zbekiston misolida Markaziy Osiyoning izchil rivojlanayotganini ko‘rish mumkin. Savdo va investitsiyalar kengaymoqda, logistika innovatsiyalari joriy etilmoqda. O‘lkaning pragmatik ochiq siyosati barcha qo‘shnilar bilan mustahkam aloqa o‘rnatishga qaratilgan.

Maskat bosma nashri yozganidek, Qozog‘iston bilan erkin savdo va investitsiyalarni rivojlantirish, Tojikiston bilan Abadiy do‘stlik deklaratsiyasi (2022), Turkmaniston bilan transport va temir yo‘l shartnomalari, Qirg‘iziston bilan 2030 yilgacha bo‘lgan strategik dastur bozorlarga shaffoflik imkoniyatini taqdim etdi, o‘zaro savdo ko‘rsatkichlari o‘sishini va investorlarning O‘zbekistonga bo‘lgan ishonchini mustahkamladi. 

Maqola yakunida yozilishicha, Markaziy Osiyo “geografiya”dan “iqtisodiyot”ga o‘tmoqda, integratsiyalashgan qoidalar, transport yo‘laklari, investitsiyalar o‘sishi va hududlararo hamkorlik formatlari mintaqani yangi kuch markaziga aylantirmoqda. 

Muharrama Pirmatova, O‘zA