O‘zbekiston Respublikasi Prezidentligiga nomzodlarning saylovchilar bilan uchrashuvlari davom etmoqda. Ana shunday uchrashuvlardan biri 16-fevral kuni Termiz shahrida bo‘lib o‘tdi. Unda Surxondaryo viloyati saylovchilari O‘zbekiston “Milliy tiklanish” demokratik partiyasidan O‘zbekiston Respublikasi Prezidentligiga nomzod Akmal Saidov bilan uchrashdi.

O‘zbekiston Respublikasi Prezidentligiga nomzodlarning saylovchilar bilan uchrashuvlari davom etmoqda. Ana shunday uchrashuvlardan biri 16-fevral kuni Termiz shahrida bo‘lib o‘tdi. Unda Surxondaryo viloyati saylovchilari O‘zbekiston “Milliy tiklanish” demokratik partiyasidan O‘zbekiston Respublikasi Prezidentligiga nomzod Akmal Saidov bilan uchrashdi.

Uchrashuvni O‘zbekiston Respublikasi Prezidenti saylovini o‘tkazuvchi 9-Surxondaryo okrug saylov komissiyasi raisi A.Ahmedov ochdi. Prezidentlikka nomzodning ishonchli vakili, Termiz davlat universiteti professori S.Tursunov ishtirokchilarni nomzodning tarjimai holi bilan tanishtirdi.

Tadbirda Prezidentlikka nomzod A.Saidov o‘z saylovoldi dasturi yuzasidan nutq so‘zladi.

Nomzodning saylovoldi dasturida milliy tiklanish g‘oyasini amalga oshirish, milliy o‘zlikni anglash, tarixni o‘rganish masalalariga alohida e’tibor qaratilgan. Shu jumladan, dasturda mamlakatimizda zamonaviy rivojlangan demokratik jamiyatni shakllantirish, O‘zbekiston tarixini chuqur o‘rganish va uni keng targ‘ib qilish, fuqarolarning huquqiy madaniyatini oshirish, kuchli milliy iqtisodiyotni shakllantirish, sog‘lom va barkamol avlodni voyaga yetkazish, sog‘lom axborot makonini yaratish hamda xalqaro munosabatlarda mamlakatimiz milliy manfaatlarini himoya qilish yuzasidan bir qator ustuvor vazifalar belgilangan.

“Kamolot” yoshlar ijtimoiy harakati viloyat kengashi qoshidagi “Yoshlar markazi” mas’ul xodimi B.Karimov, viloyat xalq ta’limi xodimlarini qayta tayyorlash va malakasini oshirish instituti o‘qituvchisi S.To‘rayeva va boshqalar nomzodning dasturi haqida o‘z fikr-mulohazalarini bildirdi. Saylovchilarni 2015-yil 29-mart kuni bo‘lib o‘tadigan O‘zbekiston Respublikasi Prezidenti saylovida faol ishtirok etishga chaqirdi.