“Dolzarb bir oylik” doirasida OKMK rahbariyati biriktirilgan O‘rta Chirchiq tumanida homiylik yo‘li bilan “Qaytmas” mahalla fuqarolar yig‘ini aholisini ichimlik suvi bilan ta’minlash maqsadida suv minorasida demontaj va montaj ishlari bajarilmoqda.

Minoraning poydevorini betonlashtirish, ichimlik suvini uzatish uchun diametri 100 millimetr bo‘lgan quvurlar yotqizilmoqda. Shuningdek, suv minorasi yoniga katta kuchlanishli transformator o‘rnatiladi.  Ushbu transformatorga tok olib kelish uchun ustunlar o‘rnatish ishlari boshlangan. Shu bilan birga “Fayziobod” mahalla fuqarolar yig‘inidagi  1 ming 200 metr ichki yo‘llarga asfalt yotqizish ishlari davom etmoqda. 

Tuman hokimligi hamda OKMK mas’ullari “Uyg‘ur” MFYda aholining tomorqalardan foydalanayotganini ham o‘rganildi va mutaxassislar tomonidan zarur tavsiyalar berildi. Bundan tashqari, “Yangiyo‘l” MFYda  ariq-zovurlarning betonlashtirilgandan keyingi holati ko‘zdan kechirildi.

O‘z navbatida “Kambag‘allikdan farovonlik sari” dasturi  doirasida Toshkent viloyatining boshqa hududlarida ham qator ishlar amalga oshirilmoqda. Xususan, Toshkent tumanidagi Oqtosh mahallasining Beg‘ubor hamda Musaffo ko‘chalaridagi 250 ta xonadon Navro‘z bayrami arafasida suv bilan ta’minlanadigan bo‘ldi. Buning uchun pudratchi “Ekspers inerginner” MCHJ tomonidan  3 ta sug‘orish qudug‘i o‘rnatilmoqda.   

A.Musayev, O‘zA