Өзбекстанның алтын-валюта резервтері 2026 жылдың ақпан айына қарай алғаш рет 75 миллиард доллардан асты.
Өзбекстан Республикасының Орталық банкі мәліметіне сәйкес, 2026 жылдың қаңтар айының қорытындысы бойынша елдің халықаралық резервтері 75,08 млрд долларды құраған.
Бір ай ішінде резервтер көлемі 8,8 млрд долларға өскен. Осылайша, алтын-валюта резервтері қатарынан алтыншы ай тарихи ең жоғары көрсеткішін жаңартты. Соңғы бір жыл ішінде халықаралық резервтер көлемі 82 пайыздан астамға көбейген.
Қаңтар айында резервтер құрамындағы алтынның құны шамамен 10 млрд долларға өсіп, 65 млрд долларға жуықтаған. Ал алтынның физикалық көлемі 12,8 миллион троя унциясын құрады. Сонымен қатар, валюта резервтері 1,2 млрд долларға қысқарып, 9,5 млрд долларға дейін төмендеген.
Алтын резервтері құнының күрт өсуіне әлемдік нарықтарда алтын бағасының қымбаттауы негізгі фактор болып отыр. Атап айтқанда, 2026 жылдың қаңтар айында алтын бағасы алғаш рет бір троя унция үшін 5,5 мың доллардан асты.
Айта кетейік, 2025 жылғы 1 қарашадағы жағдай бойынша Өзбекстанның алтын-валюта резервтері алғаш рет 59,3 млрд доллардан асқан. 2025 жылғы 1 желтоқсанда бұл көрсеткіш 61,23 млрд долларды, ал 2026 жылдың қаңтар айында 66,3 млрд долларды құраған еді.