Өзбекстанда пайдаланудан шығарылған аэродромдар туристік мақсатта жалға берілуі мүмкін
Өзбекстанда пайдаланудан шығарылған аэродромдарды туризм мақсатында қайта іске қосып, абаттандыру және кәсіпкерлік субъектілері мен бастамашыл азаматтарға жалға беру жоспарланып отыр.
Бұл туралы Туризм комитетінің баспасөз қызметі хабарлады.
Мәліметке сәйкес, мұндай туризм түрлерін дамыту шаралары Президент қаулысының жобасында қарастырылған. Құжатта белсенді туризмді дамытудың алты негізгі мақсатын белгілеу ұсынылған.
Жобаға сәйкес, шағын авиация белсенді туризмнің жаңа бағытына айналуы мүмкін. Көлік министрлігі жанындағы Азаматтық авиация агенттігі осы саладағы мемлекеттік реттеуші орган ретінде белгіленіп, әуе кемелерін тіркеу, сертификаттау, техникалық қызмет көрсету, мамандар даярлау және ұшу қауіпсіздігін бақылау бойынша қосымша алты өкілеттікке ие болады.
Агенттік ICAO талаптарына сәйкес сертификатталған, ұшудың максималды салмағы 5700 килограмға дейінгі (тікұшақтар үшін 2250 килограмға дейін) әуе кемелерінің қызметін реттейтін авиациялық ережелер әзірлейді. Сонымен қатар Көлік министрлігі үш ай ішінде шағын авиация әуе кемелерін тіркеу, сертификаттау және техникалық байқаудан өткізудің жеңілдетілген әрі ашық тәртібін, ал алты ай ішінде ICAO-ның Рим конвенциясы қағидаттары негізінде үшінші тұлғаларға келтірілген залалды өтеуге арналған міндетті сақтандыру жүйесін енгізу жөніндегі заң жобасын әзірлейді.
«Жол картасында» әуе кеңістігін пайдалану туралы ережеге U-space, G-space және W-space әуе кеңістігі санаттарын енгізу, салмағы 115 килограмға дейінгі аппараттарды тіркеу міндетінен босату (ICAO-ның 103-бөліміндегі тәжірибе), жеңіл әуе кемелері үшін «әуесқойлық» санатын енгізу, «Шағын авиация» бірыңғай интеграцияланған электрондық платформасын құру, сондай-ақ шағын авиация ұшқыштарының резервін қалыптастыруға арналған «Cadet Program» бағдарламасын іске қосу қарастырылған.
